تجربتي مع الـ coop في أرامكو السعودية

السلام عليكم .. وحياكم الله
راح أتكلم اليوم عن تجربتي خلال سبعة أشهر تدريب في أرامكو .
تخصصي هو نظم المعلومات الإدارية MIS
مكان التدريب كان في إدارة عقد المقاولات Contracting Department

أول شئ لازم نعرفه أنه كل قسم في أرامكو يختلف عن الثاني من ناحية إذا عندهم شغل لك أو لا.
بالنسبة للقسم الي أنا اشتغلت فيه كان رئيسي والمراقب على شغلي، عندهم قناعة إنه لازم نستفيد من الطالب وهو أيضا يفيد نفسه .
كان فيه قصور في عدد الموظفين، وأعمال كثيرة يجب أن تنتهي في وقتها المحدد .
بدأنا نتعلم ونراقب ونشوف ونلاحظ كيف الشغل ماشي، وبدأت في التأقلم معهم .
كان فيه كل يوم اثنين ولمدة ساعة ونصف عرض تقديمي للمقاولين فيه شرح عن كيفية التسجيل في النظام الجديد.
بدأت أقدم لمدة عشر دقايق وبعدها مسكت الموضوع كله، والحمدلله كسرت الثلج وبدأت أكون أكثر ثقة وهدوء.
طبعا الدوام من سبعة الصبح إلى اربعة العصر. بعض الطلاب يقولون أنه مادام أنك في فترة تدريب ماعندك مشكلة في غياب يوم أو يومين أو تأخير ساعة أو ساعتين ... وأنا أقول حتى لو إنك ماراح تتوظف في نفس الشركة أو كذا، حاول أنك تفكر على المدى البعيد وتكون فترة التدريب فرصة ذهبية لمعرفة وضع سوق العمل، لأنه لا مجال للكسالى.

لاتقول أنه هالشئ بعيد عن تخصصي أو إني ما أعرفه، لأنه بصراحة وضع الشركات يختلف وهم يطلبون اشياء ممكن ماتكون مررت عليها في دراستك . أنت كطالب جامعي تروح وتبحث عن الموضوع وتتشغل مع فريق وتتناقش وتتحاور مع من هم أكثر منك خبرة. ثق في قدراتكـ وقبل كذا استعن بالله،

انتبهوا من أي مخالفة مرورية ممكن تحصل عليها داخل الشركة ، لآنه هالشئ راح يسبب لك أزمة على المدى البعيد وفيها مشاكل.

راح تسألني وتقول هل تنصحني إن أروح أرامكو في فترة التدريب .
فهو يعتمد على عدة عوامل:
هل تريد أن يكون مكان العمل قريب من السكن والأهل .
هل تريد أن تستخدم لغتك الانجليزية وتطورها للاحسن
هل ترغب في التعرف على تقنيات وأمور جديدة.
هل تود في أن تختلط مع ناس من جنسيات وثقافات مختلفة
هل تود الراحة والغياب ومشي حالك بأي مشروع وبأي درجة

يعني هناك أسئلة كثيرة حاول أن تسال نفسك قبل لاتقدم على أي شركـة

راح تواجه في بعض الاحيان رفض بخصوص أفكار تقدمها أو رأي تطرحه، لأنه بعض من كبار السن، وهم صغار في التفكير ، يرفضوا أن يتقبلوا أي شي جديد ( الوضع ماشي والحمدلله).
حاول في فترة التدريب أنك لاتتأخر في كتابة التقرير أول بأول.
وتتواصل مع الادفايزور، ولاتسوي شي وفي الأخير يقولون هذا ليس من متطلبات الكو أب

فترة التدريب راح تعطيك تصور عن مهاراتك وقدراتك ووين أماكن القوة والضعف

اتمنى لكل طلاب جامعة الملك فهد بالتوفيق والنجاح . فأنتم المستقبل ، والمستقبل أنتم .

أي سؤال، أي استفسار ، أرجو منك أخي العزيز أن تطرحه لكي نفيدكم ونستفيد منكم


شكراااااا ، ​

 

لاشكر على واجب أخوي دحوووومي ...


ويارب تكون في أحسن حال

 

- لا ليست هناك أي خطة من الشركة ولكن تعتمد على رئيس القسم، هل هو مقتنع بأن طالب جامعة الملك فهد يقدر يضيف شئ ويساعدهم بأفكاره من خلال ماتعلمه في الجامعة.

-طبيعة التدريب بالنسبة لوضعي في القسم كانت ثقيلة، والعروض كانت بشكل أسبوعي، أشرح فيه للمقاولين، وأنت تعرف يجيك ناس من شتى الجنسيات والثقافات. ولازم تصبر شوي عليهم وعلى بعض الأسئلة بخصوص السستم الموجود لهم للتسجيل.

- نقاط التحسن هو كيف تتعرف على المهام التي من الممكن أن تزيد من رصيدكـ في نهاية السنة وتقييمك، لآنه فيه شغلات مهما كررتها ماراح تاخذ عليها بونص، اشتغل بذكاء.
أيضا فيه نقطة عدم الخوف من أي شي ممكن يواجهك ، يعني من بعد التطبيق زادت ثقتي بنفسي وإني أقدر أنجز وأحقق كل ما أريد لأنه المعلومات متوفرة في كل مكان بس محتاج من يبحث عنها ويحللها ويستفيد منها والانترنت هو المصدر الاول لي في حل اي مشكلة جديدة تواجهني، ورئيسي بصراحة ماقصر معي وأقنعي بأنه لامستحيل في هذه الحياة

- لسه منتهي من التدريب وراجعين للجامعة بعد أسبوع، الآن عرفت بأنه الدرجة ماراح تساوي مقدار ما أخذته من خبرة واحتكاك ومعرفة طبيعة عملي في المستقبل . وبالنسبة للدرجة ممكن يكون في نوع من المزاجية والله كريم​

 

حياك الله أخوي ومرورك على الموضوع وتعليقكـ ...

بالنسبة للقريد وما أدراك ما القريد بالنسبة للطالب الجامعي ،

أنا لا أنكر أن الجميع يتمنى بأن يحصل على قريد عالي ، ولكن أنت خذها من ناحية أخرى الي هو أن الجامعة أعطتك فرصة ذهبية ولمدة سبعة شهور تقدر تتعرف على مكامن القوة عندك وتحافظ عليها وتتعرف على مكامن الضغف وتحاول أن تعالجها ..

وليش نضع تصور ذهني أنه مستحيل نحصل على الدرجة الكاملة ، لا وألف لا، أنت بس توكل على الله واجتهد وماراح تندم ، حتى لو ماحصلت على الدرجة الكاملة بس على الاقل ماراح تلوم نفسك على التقصير..

شكرا لك ـ ,وإذا فيه أي سؤال ثاني .. أنا في الخدمة .... ​

 

حيا الله خوينا في التخصص ، طلاب الـ MIS أحلى سلام لهم جميعا ..

بالنسبة للتفصيل في بعض الأعمال راح أقول التالي:

يعني في البداية كان يعطوني شغلات مالها دخل في تخصصي وأقولهم مايصير يا جماعة وكنت أتضايق بشكل كبير وأقول لرئيسي هالشي مادرسناه في الجامعة ومن هالكلام ، ولكن يوم بعد يوم اقتنعت أنه طبيعة العمل تختلف بشكل كبير عن المواد الي أخذناها في الجامعة وأنه العالم تطورت بتقنيات وبرامج جديدة واحنا لسا جالسين ندرس أشياء يعود تاريخها للعصر اليوناني القديم.

المهم، كان فيه شغلات تتعلق ببرنامج الاكسل ، واكتشفت أشياء جديدة فيه ، وكانوا يعطوني الشغلة ويقولون هذا الـ dead line ودبر نفسك ، مستر قوقل مايقصر ، وأروح اسأل بعض الخبراء من حولي عن هالمشكلة وهكذا.

شغلة ثانية وهي أنه كان في برنامج لتسجيل المقاولين ECN واشتغلت عليه وكنت في البداية أشوف المستندات والاوراق الي تم رفعها اونلاين من قبلهم وإذا كان فيه أي خطا أقوم وأكتب تعليق ، لازم تركز مية في المية لأنه أي خطأ راح يكلفهم الكثير، وبعدين صارت المسألة روتين وطلبت تغيير المهمة هذه ، وقبلها سويت استفتاء عن المشاكل التي تواجه المقاولين وقمت اسأل الموظفين في الشركة وطلعت بنتيجة وأرسلتها لهم، يعني بالعربي حاول أن تستمتع بالعمل ،

وبعدين ذهبت للدعم الفني في السستم نفسه وكنت أرد على استفسارات المقاولين ، بالهاتف والايميل وأيضا بعض الزيارات في المكتب ، هندي ، مصري ، اسباني ، أمريكي ، سوري ، وغيرها من الجنسيات الي تعاملت معهم واستفدت شغلة مرة جيدة الا وهي الصبر و طول البااااااااال ...

وبعدين قمت افكر في المشروع الرئيسي للجامعة ، وقررنا ان يكون تصميم لموقع عن طريق خدمة الـ SharePoint وهو زي ماتقول بورتال ، وتعلمت ودخلت مواقع والحمدلله تمت العملية على خير .


في الاخير ، راح اقولك وأقول لكل الشباب ، ليست أرامكو كلها على نفس هذا المنوال ، في بعض الاقسام يخافوا يعطوا الطالب بعض الشغلات وبعدين يتورطوا ، لان بعض المدراء ماعندهم شي اسمه تفويض ،


كل التوفيق لك ، وأتمنى إني أفدتك ولو بشكل مختصر عن طبيعة الاعمال أثناء فترة تدريبي



دمت بووووود​

 

حياك الله الله أخي العزيز ،،

بالنسبة للمتاعب في عمل الريبورتات ، إذا ماتبي تتعب حاول تسليمها في الوقت المحدد ولاتحاااااول تمااااطل وتقول لسه باقي وقت وخلينا نستانس ونفلها، هالكلام ماراح يفيدكـ ، وحاول تتواصل مع الادفايزور في الجامعة وايضا السوبرفايزور في العمل اذا كان ابدى استعداده للتعاون معك في حل اي مشكلة ممكن تواجهك،

بالنسبة لو كان عملي كويس ، هو يعتمد على اذا كان فيه مكان شاغر او لا ، وبالنسبة للخبرة والمهارات الي اكتسبتها راح تبين معك في المقابلة الشخصية وراح تفرق عن الشخص او الطالب الي ماسوي شي طول فترة التدريب ، وكل واحد راح ياخذ نصيبه ، عليك التوكل على الله ثم الاخذ بالاسباب ، وماشاء الله على طلاب البترول لا خوف عليهم ، الشركات هي من تطلبهم ، ثق في نفسك وطور من مهاراتك ، اشترك في نادي ، نمي عندك مهارة انخاذ القرار ، والتواصل مع الناس ولايكون كل همك المواد الدراسية ، وهناك بطاقة الجدارات حاول تسال عنها


تفضيل الكوب على التدريب الصيفي ، هذا ليس باختياري ولكن هو اجباري على كل طلاب كلية الادارة الصناعية ، وبالنسبة لطلاب الهندسة فعندهم نظام معين بحيث ممكن تختار تدريب او كوب ، حاول ان تسال طلاب الهندسة ، فهم أعلم مني ...


شكرراااااا لمرورك الكريم ،،

​

 

الله يسلمك أخوي ،، وأنا معك من ناحية أنه الطلاب يعرضوا تجاربهم في التدريب،

لان مثل هالتجارب تختصر الطريق ،


ربي يوفقك لكل خير



تحيااااااتي

 

حياك الله أخوي ،،، وشكرا لك على التصحيح .

ولكن كما قيل لي ، إذا أخذت البريك ساعة كاملة راح ينتهي الدوام الساعة أربعة العصر ،

ولكن إذا كان الـ Launch Break نص ساعة ، راح نخلص دوامنا الساعة 3.30 عصراً

شكرااااا ، وأتمنى لك كل التوفيق

 

شكرا لك لمروركـ ،،،،


وربي يعافيك ويوفقكـ ^_^

 

حياك الله أخوي ،،،،

يشرفني مرورك وتعليقكـــ


دمت بنجااااااح وتفوق

 

فترة الكواب من أحلى الأيام التي كانت خلال فترة دراستي في الجامعة فهي تخرجك من الكرف الغير طبيعي من هووم وورك وكويز وميجر وفاينال وبروجكت واسايمنت وغيرها..

يا لها من أيام في جامعة الفهد ...