هل هناك وظائف للفريش

الهيئة السعودية للمهندسين عندهم منصة اسمها ( مؤهل ) كان المفروض انها تكون منصة توظيف للمهندسين

لكن اللي صار انها صارت منصة تشهير بالعاطلين بالاسم والصورة بدون اي فائدة على الاطلاق

لو دخلت على هالمنصة بتلقى قائمة طويلة من المهندسين اصحاب الخبرة المعطلين باسمائهم الرباعية وصورهم وبخبرات تتجاوز 9 سنوات لبعضهم

الموضوع لا علاقة له بحائل

 

الله يزينها

 

توني اشوفها والله مستغرب معقوله هالخبرات كلهم عاطلين ولا هم على راس عمل ويبحثون عن عمل اخر ؟
خبرات عاليه اللي شفتها اذا كل هذول عاطلين انا اقول مصيبه والله مصيبه

 

والله شوف الاوضاع الآن صعبه جدًا ولكن لكل مشكلة حل مرت ازمات كثيره وشح بالوظايف ومرت الحمدلله ، وترى هي ارزاق من الله سبحانه الاهم انك تبذل الاسباب ورزقك بيجيك اليوم ولا بكره ولا بعد سنه. انا جلست عاطل سنتين تقريبًا وللأمانه دورات واخذت وسيرتي الذاتية الحمدلله كويسه وتدريب واخذت لمدة ٤ شهور سويت كل شي ورحت الرياض وتدربت فيها ورحت ليوم المهنة في كل مكان وقدمت يدوي وماخليت شي ولكن سبحان الله الرزق ماتدري متى يجيك ، والحمدلله الحين لي ٣ شهور اشتغل، صبرت وربي سهلها ورزقني.

 

الشق اكبر من الرقعه انا ولد عمي خبره 7 سنوات بالصيانه وعاطل الان ومتزوج وعنده عيال ربك يفتحها بوجه ...
والله وضع المهندسين السعوديين مزري سواء كانوا فرش او خبرات كلهم انتهى بهم المطاف للعطاله اذا مادخلت شركه كبيره من البدايه راح تضيع كثير

توطين الهندسه صعب يحصل مثل الكادر الهندسي اللي من 30 سنه يطالبون فيه ولا تحقق لـ يومك هذا

 

بـ اختصار الشركات = علاقات واذا تبي تسميها بمسمى اخر " واسطات " هذا شي اخر
الموضوع ماله علاقه لـ معدل ولا سي في ولا جامعه ولـ حد يضحك عليك اصلا الاتش ار يجيه مليون سي في تتوقع بيفتحها كلها ويقراها
بيقرا اللي مكتوب بالعنوان من طرف فلان ويفتحه ويرفع السي في للاداره بغض النظر عن شكله ويتم تحديد موعد مقابله وبعدها وظيفتك جاهزه ..

انا اشتغلت بـ كونتراكت شركه مع ارامكو بمشروع ضخم كبير 3 سنوات والذي لا اله الا هو ان كل المهندسين اللي كانوا معاي ومع الشركات الثانيه توظفوا عن طريق قرايبهم
مدراء بـ ارامكو وظفوا قرايبهم في شركات كونتراكت وسب كونتراكت اللي بالمشروع اذا لقيت واحد او اثنين بالمشروع الضخم كله توظفوا فـ هو كان عشان " السعوده "

اللي يشفع للخبرات في الشركات انهم يحتكوا بـ موظفين اخرين ويكونوا علاقات بـ حيث اذا احتاجوا وظيفه في شركه اخرى يقدر يتصل على صديقه ويجيبه للشركه اللي معاه وهذا اللي فرش مو قادر يوصل لها لـ عدم وجود علاقات او تقدر تقول " واسطات "

وهذا سبب نشوف المهندسين عاطلين هنا بالسعوديه رغم انه متخرج من اقوى الجامعات والمعدل

 

ابقولك موقفين فيهم طرافة

المرة الوحيدة اللي توظفت فيها كانت بشركة وضيعة وكانوا يعطوني 3500 ريال ، المهم فيه واحد توظف معي بنفس الوقت وصار بيني وبينه نوعا ما تسميها صداقة

هو خريج من امريكا ، سالني باحد المرات انت كيف جاتك هالوظيفة ؟ قلت له تساهيل من الله و رزق

قلت له وانت كيف جتك ؟ قال انا اخذها طقطقة بس الين اشوف لي مكان افضل

واللي صار بالحقيقة انه يعرف واحد بقسم المحاسبة بنفس الشركة ، اما انا فاعرف واحد يقرب لمدير الموارد البشرية ، كلنا موظفين بالواسطة

الموقف الطريف الثاني تعرفت على واحد توظف بارامكو ويعطيني نصائح ( كيف تقدم نفسك وكيف تلبس وكيف تتكلم وكيف تخليهم يعجبون فيك وكيف وكيف وكيف )

وبعد فترة سالته ابوك وش يشتغل انت ؟

قال اداري متقاعد من ارامكو

*****************************
خلاصة القول ان هذا دونيا مافي كويس والله ، نفرات مافي سيدا

قرقر زيادة

 

ما عاد ينفع الكلام

عندك واسطة تعيش

ما عندك واسطة تسجل بمرسول تجيب كبدة حاشي لفاطمة الصبح وتنافخ عليك "ليش تأخرت !!!!!" وتعطيك تقييم سيء وهي تاكل الكبدة

هذا الواقع المرير اللي يستحون يصرحون فيه

 

هذا يوضح ان الشركة الي حاول ابوك يوظفك فيها فعلاً مافيها فرص وظيفيه ،، انا ضد التحطيم وتعليق كل شي على الواسطة ولكن في نفس الوقت ماننكر وجودها وانها سبب كبير بعد الله في انك تحصل وظيفه مناسبه ،،، عشان كذا دايم نصيحتي للمهندسين بالذات اذا عندك واسطة امورك تمام واذا ماعندك اشتغل على نفسك كثييييييير ولا ترضى باقل من مرتبة الشرف واشتغل على علاقاتك من بدري عشان ماتتعب وقت التخرج ، اذا توظفت في شركة كبيره مثل ارامكو راح تضاف لك خبره في سيرتك وغالبا راح تقبل في اغلب الشركات لو حبيت تنقل والعكس صحيح لو ماقدرت تدخل شركة كبيره اول ماتتخرج راح تتعب كثير وممكن ماراح تتحمل وتضطر تشتغل في وظيفه عاديه خارج نطاق الهندسة.

 

اخذ منك واكذب عيوني !!!؟؟

عائلة باكملها يشتغلون بارامكو انا اعرفهم

ابوهم وظفهم كلهم عيال وبنات

انا اعرفهم معرفة شخصية

لا تقول ما فيه واسطات تستفزني يا اخي

 

^
مو كل منصبه عالي في الشركه يعني يقدر يوظف في اسباب كثيره منها في مدراء يخافون عشان ماتركبهم جمايل عند المدراء في الاقسام الثانيه وبعضهم مايحب يتوسط عشان ماتطلع بوجهه مثلا خالي مثلا مهندس بـ رامكو اكثر من 25 سنه وقريد 17 على وشك التقاعد ومع ذلك ولده مهندس صار له سنه قاعد عنده بالبيت ماقدر يدخله حتى كونتراكت او بالاصح ممكن يقدر بس مايبي يسوي للاسباب اللي ذكرتها فوق ..
بالمقابل تلاقي مثلا GRO او معقب بـ شركه معينه يقدر يوظف هي على حسب شخصيه وعلاقاته في الشركه بغض النظر عن منصبه او مكانته ماننكر ان الواسطات مليانه في الشركات وعباره عن لوبيات واحزاب وكل شركه ماسكينه معينين سواء اجانب او سعوديين ..

 

يفيدني او ما يفيدني انت المفروض تقول الواقع ولا تحرف فيه لاسباب تراها صواب من وجهة نظرك

هذا اللي يصير ونقوله بدون تحريف