اوووووه ،،، موضوع جداً رهيب. وسواس البلاط عندي لدرجة اني لا صارت البلاطات صغيره زي اللي في حوش البيت تلقاني "اشقح" بلاطتين بلاطتين في المسجد لا قربت من الباب افرمل و اتاكد اني ادخل باليمين . لا توظيت ولا غسلت لازم ارش المويه اللي باقيه في اصابعي على المرايه < اتحدا احد مثلي في المسجد لا صارت الفرشه مخططه للصفوف ، ما احب ادعس ع الخطوط ،، احاول اتجنبها :S عندي نفس مشكلة محمد في انحراف الاشياء . لازم تصير متوازيه او متعامده. مواعيد الفاينلات لازم اشيكها كثير جداً . كذلك الايميل اللي ارسله للدكتور احياناً ارجع اقراه عشان ما اصير غلطت فيه . التشييكه الثلاثيه و باب الغرفه اعتقد كل الجامعه تسويها . موفقين في التخلص من وسوساتكم p:
بما انها انجرحت كرامتي بموضوع الزواج بأجيكم هنا وساوسي كثيرة , الله المستعان 1- التشيككة الثلاثية 2- تشيك باب الغرفة كل ما طلعت 3- تقفيل السيارة بالريموت , اقعد اقفلها بالريموت يمكن فوق 10 مرات 4- وسوسة الريحه , عندي فواحة بالغرفة لازم اشغلها كل يوم مرتين أو ثلاثة بعد تندوري مياس خاصة ,, 5- وسوسة نظافة لغرفة , لاشفت شي مب في مكانه اقوم انظفة لو اني اذاكر 6- وسوسة البلاط + خطوط سجادة المسجد 7- وسوسة اني لاصرت انام , لازم يكون شي شغال قدامي تلفزيون , مسلسل , مقطع يوتيوب , ما اعرف انام بدونها
خذ هذي جديدة ما اقدر انوم الا والمكيف شغال!! حار، بارد ، دافي ما يهم اهم شي صوت المكيف مراسلكم من قلب الحدث (راسي يصفّر)
جاكم الوسواس الاعظم الي يجمع جميع فنون الوسوسة : 1- وانا امشي بالبلاط احاول اسرع خطواتي واشوف بكم ثانية اعدي مثلا 3 بلاطات اعديها في ثانيتين احاول اعديها في ثانية وهكذا . 2- قبل ما اخرج الغرفة لازم اتاكد من الباب انه مفتوح 3 مرات. 3- لمن اروح الحمام الله اكرمكم لازم اسحب السيفون مرتين<<<, وانا اقول ويش سبب قطع الموية 4-ما اعرف انام لو في حتة نور ولازم يكون المكيف شغال وبارد ولو كنت متجمد من البرد. 5-لوحات السيارات اقعد اسوي مقارنات بين الارقام وبين الحروف . 6- ما اعرف اذاكر الا لمن ارتب الغرفة كاملة . 7-اقعد كل شوي امسك جيوبي ادور لى المحفظة والجوال. 8 واخيرا- اقعد ادور على الاشياء وهي في يدي مثال دايما يصير معي اكون اكلم واحد من الجوال وفجأة انا أسكت يقلي ويش فيك اقله قاعد ادور على الجوال هههههه والله موضوع في الصميم بس صراحة الي تفاجأة من الشعب طلعوا اصحاب بلاط ولوحات مثلي هههههه
اكبببببر وسواس حاليا في فترة الفاينلات ،، كل ابو نص ساعه اشيك الدرجات والقريدات اذا نزلت او لا ،، ويب سيتي بورتال ، بورتال ويب سيتي ، ويب سيتي بورتال ، بورتال ويب سيتي ،،
انا وسواسي نفس وسواس البلاط بس بدرجة ثانية يعني لما امر جمب سيارة او بيت او اي شئ اجزئه واحاول امر في كل جزء بالتساوي يعني اقسم السيارة ل الكفر اللي ورا وبين الباب اللي ورا وبيعدين الي قدام وبين الكفر اللي قدام وهلم جرا متخيلين كيف المنظر بس اقعدد اطامر واباعد واقلص مشيتي عشان تتناسق مع الوسوسة بس استمتع الصراحة من الوساوس اللي عندي وساوس لوحات السيارات احب اشوف علاقة الارقام يعني جمع الرقمين يساوي الرقم الثالث وحركات من كذا
انا وسواسي لو جيت اطول التلفزيون لازم يكون مستووى الصوت من مضاعفات الخمسه يعني لو صار الصوت 19 ازوده واخليه 20
و الله موضوع حافل...خصوصا في بيئة مفعمة بالدوافير الملاحيس مثل جامتنا أنا عندي وسواس مع العدد 2...أقعد أضرّب 2 بنفسها بـ 2 بـ 2 بـ 2... ..يعني 2, 4, 8, 16, 32, 64, 128, 256, 512, 1024, 2048, 4096, 8192 , 16384 و هكذا الحين و أنا قاعد أكتب ما أقدر أوقف أبي أضرب زيادة. حتى لما أشوق أعداد في الشارع في اللوحات أضربها بـ 2 عندي وسواس يوم أركب السيارة...سيارتي أمريكية و درجة الحرارة بالفهرنهايت...لازم كل شوي أقعد أحولها للدرجة المئوية عندي وساوس في نطق عبارات معينة...بس ما أعلم.... بأيام الاختبارات ما شاء الله الوساوس تتكاثر...و تطلع إبداعات جديدة
في وسواس يا جماعة و هو تكرار الجملة بجميع احتمالات تبديل مواقع الكلمات مثال: جملة "كيف حالك يا أحمد" أنا وش أسوي؟ أقعد أقول بيني و بين نفسي كذا أحمد. كيف الحال؟ كيف يا أحمد حالك حالك كيف يا أحمد كيف يا أحمد حالك و هكذا إلى أن تنتهي جميع الاحتمالات أو إلى أن يقاطعني شيء آخر