خطأ يكبد طلاب الجامعه المئات

كلنا يعرف ماذا يحصل اذا حذف ماده و لم يعيد الكتاب الى مستودع الكتب .....
يخصم من مكافأته قيمه الكتاب حتى ولو اخذ الماده في الفصل القادم


لكن ماذا يحدث اذا حذف الماده ولكنه لم يستلم الكتاب اصلاً

الخطأ الذي اتكلم عنه هو انه ايضا في هذه الحاله سيتم خصم قيمه الكتاب من مكافأته كانه استلم الكتاب تماما ......


وهذا ما حصل معي شخصياً ..... المكافأه الاخيره مخصوم منها 85 ريال و كم هلله ....

رحت لمستودع الكتب و سألتهم قالو اكيد فيه كتاب ما رجعته بعد ما حذفت الماده .... و انا كنت متأكد تماما انه هذا الشي ماحصل ...... انا فعلا حذفت ماده في الفصل الي فات لكن ابدا ما استلمت الكتاب....

قام الشخص المسؤول يراجع الكشوفات الي تجيهم من المسجل ووجد اني حاذف ماده coe ..... قلتله يا اخي صحيح انا حذفت الماده لكن ما استلمت كتاب ..... قال طيب خلني اراجع ملف الطالب عندنا ...... راح و جاب ملفي الي هو عباره عن كل الفواتير (اذا يمكن تسميتها فواتير) حقت كل الكتب الي استلمتها من المستودع من يوم خشيت الجامعه ولا لقى فيها كتاب الماده هذي ...... قال لي خلاص ارجع لنا و نعوضك ان شاء الله ...... و حقك ما يضيع ....



طبعا انا عارف ان حقى ان شاء الله ما راح يضيع لكن هذا لاني موجود و اطالب به ..... لكن غيري مئات من الطلاب الي حاذفين مواد ولا استلموا الكتب و مخصوم عليهم قيمه الكتاب ولاهم موجودين في الصيف علشان يطالبون بحقوقهم .....



الآن هل يعني يا مستودع الكتب وجود اسمي في كشف المسجل للطلاب الي حذفوا مواد اني استلمت الكتاب ........ بالعقل يعني ماهو المفروض قبل ما ترسلون اوراقكم للماليه علشان يخصمون علينا ماهو لازم تتأكدون انه فعلا الطالب استلم كتاب ولا لا ....


ما ادري ايش اقول غير الله يعين

 

بسم الله الرحمن الرحيم .....

اللهم اشهد على كلامي هذا ..... فأنت خير الشاهدين

آخر التطورات في موضوع الخصم .....

ذهبت اليوم للمستودعات و دخلت مكتب الشخص الذي كنت على موعد معه ... و لما جلست قال لي و بالحرف " انت كيف تقول انك ما اخذت كتاب و انت ماخذ كتاب و موقع على الورقه انك ماخذ"

انا بصراحه ماعرفت وش اقول .....

ماهو لاني شكيت في نفسي ..... لاني متأكد تماما اني ما اخذت الكتاب مثل ما انا متأكد من اسمي .... لكن فعلا تعجبت لاني قاعد اتوقع كيف راح يثبت لي اني اخذت كتاب و موقع على الورقه و انا ما وقعت ....

قلت له ياخي معليش انا متأكد اني ما اخذت الكتاب ابدا ..... لاني يوم نزلت الماده كنت عارف اني بأحذفها قبل ما بداية الترم اصلا ..... لاني سجلتها تسجيل مبكر ..... و اول ما بدأ الترم حذفتها فمستحيل اكون اخذت الكتاب و انا عارف اني بأحذف الماده ....

قال لي لا احنا راجعنا ملفك و لقينا الورقه الي وقعت عليها

قلت له كيف لقيت الورقه و انا و اياك امس مدورين في الملف ولا فيه شي ..... قال لي ماعليك من الملف احنا عندنا اوراق كثيره ماهي مرتبه و لقينا ورقتك فيها وهذي صورتها .....

ووراني الصوره

وعلشان اوضح لكم .... تعرفون انكم لما تستلمون كتب يكون فيه ورقه ورديه و بظهرها ورقه بيضاء نظام صور الكربون ..... يعني توقع على الورديه و توقيعك يجي على البيضاء ....

الي وراني هو كانت صوره بمكينه التصوير من الورقه البيضاء الي دورها امس وانا معاه ولا لقيناها ....

و المشكله الكبرى ان الصوره فيها كتاب واحد بس وهو كتاب الماده هذي يعني لو كان كلامه صح معناها اني جيت اخذ الكتاب هذا لوحده وهذا مستحيل يصير لاني مارحت الا مره وحده للمكتبه .....

لكن يا اخواني ..... الشيئ الي فعلا صدمني و خلاني اتعوذ من الشيطان ميه مره هو ان الصوره واضح جدا فيها انه مصوره من ورقتين ....

يعني الجزء الاول الي فيه اسم الكتاب و رقمي و رقم الماده من ورقه و توقيعي في اسفل الصفحه من ورقه ثانيه ......

طبعا انا قلت له هذي الورقه ماتعني شيئ .... وياليتكم شفتوا وجهه كيف صار ....

قال لي كيف ماتعني شيئ ...... قلت له ليش ما توريني الاصل .... و كمان وجهه تقلب ...

قال اصلا احنا ما هو مفروض نوريك ملف الطالب هذا شيئ خاص فينا و مفروض انت تجيب الورقه الحمراء .....

قلت له سبحان الله يعني انقلب النظام الحين و صار انا الي لازم اثبت اني ما اخذت الكتاب ..... العقل و المنطق و القانون الي خلاهم يسوون الورقه البيضاء و الورديه و كل الاوراق الثانيه هو علشان هو يثبتون ان فلان اخذ كتاب ولا يحق له ياخذ مره ثانيه و اذا حذف الماده ولا رجعه ينخصم عليه ....

يعني بالعربي هم الي مفروض يثبتون اني اخذت كتاب وماهو انا ...... اصلا اذا انا ما اخذت كتاب كيف يكون عندي ورقه .... ورقه مكتوب فيها ما اخذ كتاب ؟؟!!

المهم هو تغيرت نبرة صوته ولا عاد مثل اول يتكلم بقوه ويهددني كاني سارق ...... وطبعا هو بين كل كلمه و الثانيه يقول تعال نشوف السيستم .....

انا قلت له وين كان السيستم امس ..... ولا يعني السيستم ما يجي الا مع الورقه المصوره ..... رد علي وقال " ........ " يعني ولا قدر يقول شي .....
بس قال تعال نشوف السيستم ..... قلت طيب رحنا للسيستم لقينا فيه اني ماخذ كتاب ..... وهنا بصراحه خفت اكثر ...... خفت عليهم بصراحه لان هذي حركه كبيره و ما تمشي بكل سهوله ....


وشوي دخل واحد ثاني يقول انه اخذ ماده و حذفها ولا استلم كتاب ....
نفس موضوعي ....

قام اخونا يقلب في الكشف الي عنده من المسجل (كشف الناس الي حاذفين مواد).... و يقول لي شفت فيه ناس ثانين مخصوصم عليهم وهو يبتسم ...... وانا رديت عليه و انا اضحك .... ايه ماعليه المهم تأكد هو استلم كتاب ولا لا .... قام سكت .....

وسبحان الله وهو يدور دخل واحد ثاني وقبل ما يجلس قلت له اكيد مخصوم عليك قال ايه .....


المهم قالي انتظر بالله اخلص الاخوان و ارجع لك ...... وانا ماعندي مشكله ابدا مستعد اقعد الى بكره ..... اهم شي نشوف وش النهايه


خلص الاخوان هذول على انهم يرجعون له بعد الظهر يكون هو شيك على ملفاتهم (اتمنى بس مكينه التصوير تخرب اليوم )

المهم رجع لي وقال شوف احنا بصراحه لما جردنا لقينا كتاب زياده ( والله قالها بالحرف) ولكن ماندري هو لك ولا لواحد ثاني ..... قلت له مستحيل يكون كتابي لانه اذا كان كتابي معناها اني جيت المكتبه و وقعت على الورقه اني استلمت كتاب و نسيته عندكم ..... وهذي مستحيل تصير خصوصا و اني حسب كلامكم جاي اخذ الكتاب هذا لوحده فمستحيل انسى كتاب انا جاي اخذه لوحده ؟؟!!

بالاضافه الى انه حسب التاريخ الي عندكم لو كان صحيح فانا قد حذفت الماده ولا يمكن يطلع لي السيستم البطل كتاب لماده انا حاذفها

انا بصراحه رحمته لاني حجرت له تحجير والله يمكن ما قد لقى مثله في حياته ....

تدرون ايش قال ...... قال شوف انا مصدقك وبعد حلفانك هذا اكيد انك صادق بس روح تأكد يمكن ان الكتاب عندك في الغرفه و انت ما شفته ولا شي ..... قلت له شوف انا ماجيتك هنا من امس الا و انا متأكد ...... و بعدين لو كنت انا فعلا ماخذ كتاب و جاي اتبلى عليكم و ابغاكم تعوضوني بارجع بعد شوي و بقول لك مالقيته ..... فانت ماراح تفرق معك الي بتسويه بعد شوي بتسويه الحين

قال لا انت ثقه و كررها 3 مرات (والله بالحرف) ومستحيل تكذب ...... قلت له الله اكبر الحين انا صرت ثقه و قبل شوي تقول ليش تقول ما اخذت كتاب و انت ماخذ وهذي ورقه تثبت انك ماخذ ......

وبعدين هات الورقه هذي ابغى اشوفها مره ثانيه ..... قال لا خلاص ماني بعطيك انت ما انت معترف فيها ...... قلت له انت وش بتخسر اذا انا معترف فيها ولا لا هذي حسب كلامك تثبت علي اني اخذت كتاب ولا هي في صالحي فانت ليش خايف .....

قال اسمعني تبغى ينحل الموضوع رح دور للكتاب و تعال ...... قلت له شوف انا باروح و بارجع لكن بارجع بقول لك ماعندي كتاب وش بتسوي قال بنعوضك حقك ماراح يضيع ......

اها ..... الحين صار حقي .... طيب حلو

ورحت اخذت فره برى ورجعت لاني متأكد وقد حست الغرفه فوق تحت ولا لقيت شي ......

رجعت له قال لي الحين انت تبغى كتاب ولا تبغى فلوسك .....

يعني اش اقول له هذا بالله عليكم ...... انا مخصوم مني فلوس على كتاب ما اخذته يعني بالعربي ابغى فلوسي و اذا جيت الترم الجاي ابغى كتاب ما يبغالها هذي ......

قال طيب هات شيكك ناخذ منه صوره ....

قلت طيب هاك .... وصوره ورجعه لي وخلاني اكتب اقرار باني استلمت منه مبلغ وقدره 85.65 ريال مقابل كتاب ماده coe ..... على فكره ترى قيمه الكتاب عندهم 82 ريال في السيستم ...... يعني ما ادري 3.65 او اكثر عن كل كتاب تروح فين .....

المهم عطاني 85 ريال ...... وجاء واحد ثاني من الموظفين وقعد يسألني انت اخذت الكتاب ورجعته ولا ما اخذت كتاب ولا ايش المهم هذاك الاول قام صرف السالفه و سحب خويه وراه وقال خلاص انت اتكل على الله

قلت له طيب واذا جيت الترم الجاي استلم كتاب ..... وقالوا لي انت مستلم من اول وش اسوي ..... قال لا ما عليك انا امسحه لك من السيستم ..... قلت طيب واذا طلعوا لي الورقه هذي الي مكتوب فيها اني مستلم كتاب و موقع عليها وش اسوي ...... قال لا ما عليك انا اتصرف ......


يعني بالعربي طلعت الورقه مالها داعي و السيستم يمديه يلغى منه الكتاب .....



طبعا فيه ناس بيقولون انت احمد ربك جاتك فلوسك وايش تبغى .....

هذول اقول لهم احمدوا ربكم ما رفعت الموضوع لفوق و بس خليتها على المنتدى والا ترى سالفه الورقه المصوره هذي ما تمشي علي ووالله لو انه استقعد لي زياده ولو على خفيف ما يردني الامدير الجامعه ......

يعني حرام عليهم ...... على 85.65 ريال بتصورون ورقه من ورقتين و تدمجونهم مع بعض كانهم ورقه وحده (كل هذا الكلام علشان ما اقول كلمه وحده قويه وانتم كلكم عارفينها)


اللهم اشهد على ما اقول و اشهد على اني مارفعت صوتي على الموضوع وتكلمت معه بكل ادب و منطق علشان لا احد ينشف في حلقي ويقول ان الطلاب دايم يقلون ادبهم على الموظفين .....


وترى طلبته اكثر من مره اشوف الاصل و عيا يورني اياه ..... و قلت له اكثر من مره انا بس ورني الاصل الي انا موقع عليه وحطه في وجهي ولا عاد اتكلم .... ولا وراني ابد

وسلامتكم .....


واي واحد صار له نفس الشيئ يا ريت يرد هنا علشان نتأكد من السالفه و نشوف لها حل جذري يرضى الله و رسوله

 

اعوذ بالله من الشيطان الرجيم ....

والله من القهر طلع لي اكثر من 20 خطأ املائي في الموضوع وقعد اصلحهم .....

يا رب اذا كان الي اتوقع انه صار صار فعلا فعليك بهم .....

 

والله يا شباب انا بصراحه وضعي مشكوك فيه ....

تخيلوا وش بروح اقول للمدير

انا رحت لمستودع الكتب و طلعوا لي ورقه مزوره يقولون هذا توقيعك ....

بيقول لي وين الورقه .... وش اقول له ...

الموظف الخايس اقولك عيا يعطينيها ...... لا وقاعد يحرسها كانها كنز ..... وش اسويبه اظربه و اخذها يعني .....

اصلا الورقه هي القضيه وبدونها مالي عندهم شي ....

ولا تتوقعون ان المدير ممكن يغلط غلط كبير زي كذا و يشكك في امانه اي موظف بدون ما يكون عنده دليل ....

يعني انا قعدت احسبها في راسي ولقيت ان روحتي للمدير مافيها اكثر من احراج لي و احراج له لانه ما راح يسويي اكثر من انه يقول لي خلاص خل الموضوع عندي و انا اشوف

وبعدين انا بصراحه ماني فاضي للمرمطه و كل شوي وانا رايح جاي عندي اختبارات و بعدها باسافر ....

الله فكهم مني والله ....... والا والله باقي شعره و اتلابش مع الآدمي وخلهم يقولون ليه ضربته ..... لانه بصراحه هذا نصب عيني عينك ....

الله ستر بس


ماقصرتوا والله و مشكورين على الردود ........ انا بصراحه بعد السالفه سمعت ان فيه اكثر من واحد بعد صار لهم نفس الشي و مخصوم منهم بدون وجه حق ومنهم اثنين من اخوياي ....


الله اعلم انهم سووا مصيبه كبيره في مستودع الكتب وصار عندهم عجز وبغوا يغطونه بالطريقه هذي .....

تدرون السالفه اذا كانت صح اجل يبغالها روحه للمدير ماهو علشان سالفه التزوير ..... لكن يمكن فيه اكبر من التزوير ....

خلوني بس اخلص بكره من الاختبار