ابوحمرائيات .. الى ابنائي الاوريات مع التحيه !

هاهو ابوحمرا .. قابع امام لوحة مفاتيحه وهو يقلب راسه ويتسائل كيف يبدأ بموضوعه !
ولكي اكون صريحا معكم .. فان اصعب مافي كتابة المواضيع وشلون تبداه ووشلون تنهيه !
ولكن لانني شخص اعتبر نفسي أخوكم ( وارجو ان تعتبروني كذالك ) واعتبر نفسي امون ( وارجو ان لا تعتبرون انفسكم تمونون ! ) < وش تبي انت
فـ سابدا بالموضوع علطول


منذ يوم الثلاثاء وارض المنطقة الشرقية قد انيرت واحتفلت بقدومي .. بعد انقطاع دام صيفا كاملا الله يصلح اللي يتنعفق ولا ياخذ صيف
ومنذ يوم الثلاثاء وانا انظر الى ازواج الاورياء يتجولون في ارجاء الجامعة الميمونه بملابسهم الجديده وسياراتهم التي لم يزيلو اكياس الوكاله عنها بزعم انهم محافظين عليها
واعينهم مليئة بالدهشة والامل وبعضهم قد اعتبر نفسه مهندسا او اداريا من الان ولم يعلمو ما تخبي لهم الايام بين طياتها .. ولم يصلخو بعد في ذاك الفريزر الكبير ! ( مبنى 54 )
وجوه مبتسمة .. اعين تنظر الى ارجاء الجامعة باستغراب .. واعين تنظر الى اعين ثانيه وتقول وش يبون ذولا ! .. واعين ابوحمرا وهو ينظر اليهم كلهم ويقول الوعد بالجبل يا احباب الله وقد ابتسم ابتسامة خبث وهو يرتشف مايدعوه بغذاء الروح ( القهوه ) ويحك رأسه بعد ان بدأ مفعول الماء المالح بينما كان يطل عليهم من عمارته الموقره ..

في هذا الموضوع سوف اهديكم عصارة تجربتي التي دامت 4 سنوات في جامعتنا .. وليست جامعتكم لانكم اوريات !
قد يوافقني الكثيرون .. وقد يعارضني الكثيرون ايضا
ولكن هذه مجرد تجربتي ووجهت نظري حسب المواقف التي مرت علي في الجامعة وحسب ما تعاملت معها .. فأرجو منكم ان لا تعتبروه الكلام الوارد في هذا الموضوع صحيح 100% او خاطئ 100% ولكن استفيدو من كلامي الواجد ومن تجربتي المالحه ! ( لا استطيع ان اقول مره ولا حلوه ! فـ مالك الا مالحه ودبرو اموركم انتم عاد )

ابني العزيز الأوريا .. اعلم يا رعاك الله انه من الان والى مدة 5 سنوات قادمه انك سوف تكون من طلاب جامعة الملك فهد ومن سكان المنطقة الشرقيه
وانصحك شديد النصح انك تقتنع بانك من سكان الشرقية وبان غرفتك بالجامعه ( انكانك ساكن في السكن ) هي بيتك وأنك ستقضي غالب وقتك فيها
فـ حاول التأقلم مع ذالك .. ظبطها وتكتكها على كيفك .. حط فيها كل ما تحتاجه .. ثلاجة .. تلفزيون .. فراش مريح .. رتبها بما يناسب مزاجك
لان اغلب مشاكل الطلاب هي مع عدم الاستقرار .. يعتقد انه هنا فترة مؤقته وبس فـ يأقلم نفسه مع الشي هذا ويعيش نظام حياة فوضوي كأنه مسافر هو واخوياه الى اي ديرة ثانيه ابويومين وراجع مما يؤثر على اشياء كثيره واولها النفسيه .. وتخمه بما ندعوها بأم العبيد وتقفل اخلاقه ويديور لأهله

ثانيا .. أعلم يا عزيزي ان هنالك عدد من الاشياء سوف تفتقدها كثرا في عالم العزوبيه ..
ليس هنالك والدين ( الله يطول بعمار والداي ووالدينكم ) يدخلون عليك ويطفون المكيف ويولعون اللمبات وقولون قم وراك دوام ! او يسحبون البطانيه مع عدد من التهزيئات والمواويل التي تبدا بـ قم ! وتنتهي بـ شباب هاليومين ..
ليس هنالك فطور في الصالة .. وليس هنالك مطبخ تدخل وتلقط ما تيسر وتاكله وتنطله وتمشي ..
ليس هنالك وجه أفنس تنطل عليه ثيابك وتقول ( غسليها ! ) وتذهب .. وكذالك هذا الوجه الأفنس لن يكون موجودا ليرتب غرفتك ويغسل مواعينك ..
والكثير من الأشياء والأشخاص الذين يجعلون حياتنا سهله .. فحاول التأقلم مع فقدان هذه الاشياء

ثالثا .. احرص شديد الحرص على أصحابك .. واكرر واعيد شديد الحرص
فـ ولله الحمد رزقني الله بشله وعدد من الاصدقاء الذين اتشرف بمعرفتهم ولو خرجت من الجامعه بهؤلاء الاشخاص خير عندي من الخروج بشهادة هندسة دون هذه المعارف !
حاول ان تكون علاقة مع عدد لا يقل عن 4 ولا يزيد عن 10 اشخاص علاقة شديدة ... وحاول ان تكونو ذوي توجه متقارب وافكار متشابهه لأنهم سوف يكونو عائلتك خلال سنوات الجامعة والى ما بعد الجامعة انشاء الله .. وان حصل انكم تكونو رماميت مع بعض فـإن ذالك سيكون افضل وأفضل

رابعا .. وانا عن نفسي اعتبر هذه اهم نقطة في الموضوع ..
كما تعلم يا ايها الطالب ان الجامعة عدد طلابها يقارب 8000 طالب .. وهؤلاء الـ8000 ليسو من منطقة واحده
فـ اذا كنت قد تربيت في بيئة محافظة فاعلم ان غيرك من الطلاب تربو في بيئة متفتحه .. واذا كنت متفتح اعلم ان غيرك محافظون وغيرك أكثر تفتح منك .. واعلمو ان هنالك منهم متفتحين لدرجة مالها داعي !
فـ لا تشره واجد أو تتحلطم وتحاول ان تغير توجههم او تفكيرهم الى ما يناسبك ! وكذالك لا تتأثر بتوجهاتهم أو تفكيرهم او نمط حياتهم
وقد استشهد بذالك على قصة حصلت لي في الاوريا .. وقتها كنت قاعد بالسناك بار وكان على يميني طاولة فيها اثنين يسولفون .. فمرو مجموعة اخرى وتوجهو الى الكاونتر لكي يطلبو الشطائر اللي تقطع تسبدك ..
فما كان من الاثنين اللي قاعدين الا ان نتفوهم ! ( شوف الصروب اللي دخلو .. كاااااااااااااااي ) .. وظفو كتبهم ومشو .. ولحسن حظي قعد جمبي مجموعة الصروب ( على قولة اللي كانو جمبي ) .. ومن سخرية القدر اول ما جلسو قالو ( شفت الزلايب اللي كانو هنا وشلون لابسين ؟ هههههههههههه يا شيخ اول مره اشوف رجل لابس وردي ) ! ( عارف انكم بتقولون والله يا ابوحمرا ملقوف متكي ويتسمع لخلق الله بس لا تشرهون )
فـ حط في بالك انه من الحين اذا نظرت الى ناس نظرة فيها استغراب او تعجب سواء من طريقة الكلام او اللبس او التصرفات او غيره .. فـ تراهم ينظرون لك نفس النظره ! لا تسوي نفسك ذيب وتقول انا صح
انت صح في وجهت نظرك وهم صح في وجهت نظرهم ايضا

وللأمانة يا اخواني اللي امون عليهم القراء .. فقد قفل مخي ولا عاد طلع معي شي اكتبه
فـ اكتفي بهذا القدر وانشالله يكون مفيد لكم ويساعدكم على التأقلم في الحياة الجامعية من وجهت نظر اجتماعية ( بالله وش رايكم ما تحسون انها سجع ؟ )
وان الله اراد سيكون هنالك عدد من الاجزاء التي تهتم بوجهات نظر اخرى مثل أكاديمية و ماليه وغيرها ..
ولا اقول وداعا ولكن الى اللقاء في اذاعة اخرى ( وجه اوريا يقول متى تبدا اذاعة الجامعه ياعيال ؟؟ )
هذا والله اعلم وصلى الله وسلم على نبينا محمد وعلى اله وصحبه أجمعين ..
كتبه العبد الفقير الى عفو ربه .. أبوحمرا

 

koRaBeKa
الله يسلمك
ننتظر ردك بعد القرائه

------

الملازم
ياخي ههههههههههههههههههه
احرجتني مدري وش اقول
اشكرك على المرور