السوق الوظيفي في ظل جائحة كورونا (نقاش)

عليك السلام ورحمة الله وبركاته
هلا سعود، يعطيك العافية.
الله يكتب لنا جميعاً الخير.

أشكرك على فتح الموضوع، الواحد يفكّر مع نفسه واجد هالأيام، على الأقل التفكير بصوت مرتفع أفضل.
حسب ما أشوف وأسمع من بعض الاقتصاديين:
الأزمة اقتصادية بسبب الإجراءات الاحترازية الي صارت (الناس ماتطلع = الاستهلاك انخفض = الشركات قلّت إيراداتها/المدخول))
عشان كذا كان اللجوء لإجراءات التسريح.

شركة كريم سرّحت 31% من موظّفيها، الرئيس التنفيذي يقول حوالي 80% من عملنا توقّف.
طبّق هذا على القطاعات من المطاعم إلى شركات البتروكيماويات.

بعبارة أخرى: لو انتهى الفايروس اليوم، راح يرجع التوظيف.
سؤال: كيف راح يكون شكل التوظيف بعد نهاية الأزمة؟ هل فيه شركات راح تعتمد العمل عن بعد، هل فيه مهارات معيّنة راح يزيد الطلب عليها؟
ما أدري.

الملاحظ الفترة الماضية (حسب ما أشوفه) ثلاث أمور:

1- صار فيه تسريحات خصوصاً في القطاعات الخدمية الي لها تواصل مباشرة مع المستهلكين، وهذي متوقعة لأن الإيرادات نزلت فلابد من تخفيض التكاليف علشان تستمر الجهة/الشركة هذي.
2- بعض الجهات الأخرى خفّضت ساعات العمل (وتبعاً لذلك تخفّض الراتب)، وبعض موظّفيها حوّلتهم لـ "ساند".
3- فيه جهات أجّلت/جمّدت إجراءات التوظيف.(أحد شركات الـ Big 4 كنت مقدّم عليها وأرسلوا: وقّفنا الحين بسبب كورونا، راح نرجع لك في الصيف نكمل الإجراءات).

بالمقابل، في LinkedIn إعلانات توظيف مستمرة، انخفظت فترة لكن رجعت من بداية الشهر هذا.

 

وعليكم السلام ورحمة الله

السوق ناشف من قبل الأزمة ...

خلال فترة الأزمة الوظايف للفريش معدومة لكن فيه بشكل بسيط جدا للي عنده خبرة

السوق لسى ناشف ووظيفة او وظيفتين خلال الاسبوعين الماضيين مايعتبر شي واو لانه لسى الشركات تحتاج وقت لين تتعافى ويبدا التوظيف


وهذا لايعني انه يجيك احباط من الوضع الراهن قدم بكل الطرق المتاحة على اي فرصة تشوفها واستغل الوقت بالدورات والتطوير للمهارات


وفقك الله

 

من وجهه نظري الوضع سيي . وافضل الشي الواحد يسويه يستثمر في نفسه دورات او تدريب ويكمل تقديم لين ربي يفرجها

 

الوضع قبل كورونا سيئ وبعد كورونا سيصبح اسوأ طبعا للمهندس السعودي سواء " فريش او خبرات " من ناحيه فرص وظيفيه حقيقيه
اثنين من زملائي تم تسريحهم من شركه ميكدرموت الامريكيه بعد خدمه 5 سنوات وهي شركه كبيره قبل اسبوعين وشفت كثير managers سعوديين في لنكدن تم تسريحهم والعدد قابل للزياده الفتره القادمه خاصه ان في كثير شركات 70 % حولت موظفيها لـ ساند والاخرى اجازات بدون رواتب هل سيعودون بعد شهرين ام سيتم تسريحهم كذلك ؟

واعرف زملاء لي في شركات قطاع مقاولات وتم تسريحهم كذلك تحت بند " القوه القاهره "

ازمه كورونا بهدلت الشركات بـ شكل كبير وكشفت ان القطاع الخاص عندنا قطاع هش وغير مستقل عن الحكومه للاسف , في مجازر تحصل الفتره هذي للشركات خاصه على السعوديين اللي يمثلون خط الدفاع الاول عن اي ازمه للاسف بينما الاجانب الضرر عليهم قليل جدا جدا ..

الفتره القادمه يبقى السؤال متى راح تنتهي ازمه كورونا ؟ وكم يحتاج الاقتصاد بعد ازمه كورونا حتى يتعافى ويعود التوظيف ؟ وهل ستتغير اليه التوظيف بحكم ان شركات كثير جربت العمل عن بعد وقلصت عدد الموظفين؟ وراح تطبق نظرية ( 20 / 80 )
قالوها م قبل كورونا لن سيكون مثل بعد كورونا

لا تنسى كذلك 15 % الضريبه القادمه على الشركات خاصه اللي تشتري ماتريال الخ مثل قطاع المقاولات ومصانع كثيره , بـ اعتقادي وحسب نظره واقعيه للسوق لازم نكون مستعدين لـ السنوات القادمه اللي بتكون صعبه جدا

الحلول ؟

حاول انك تطور نفسك الوقت الحالي والرزق على الله
حلول اخرى : عندك القطاع العسكري واللي يشهد عدد كبير من المهندسين توجهوا له قبل كورونا واعتقد بعد كورونا راح يرتفع اكثر

 

اتوقع و هذي وجهة نظر من راسي
الان فيه انهاء عقود للموظفين اصحاب الرواتب العاليه و الشركات بتحاول تتكيف مع الوضع باقل عدد ممكن من الموظفين . بعد ما تنتهي ازمه كورونا بأذن الله طبعا مو بيوم و ليله بيتحسن الوضع يبي له عالاقل سنه سنتين حيبدا التوظيف و بيكون النصيب الاكبر للفريش لان رواتبهم اقل

 

أسأل الله أن يكتب لكم الخير.

الحل لكم بنظري في عدة أمور منها:

١- الدورات التدريبية ( سواء دورات تدريبية مهنية أو للاستفادة الذاتية)

٢- ممكن موضوع العمل عن بعد و أيضا التجارة الالكترونية راح يكون موضوع مهم هالفترة في ناس عندهم مثلا قدرات جيدة في الكتابة ممكن يتوظف أون لاين عن بعد و يكتب تقارير أو يشتغل على ملفات أكسل بأجر معين ، ممكن شخص عنده لغة جيدة يشتغل في موضوع الترجمة ... و هكذا.

هذا الموضوع ما أقدر أتكلم فيه بإسهاب لعل فيه ناس تتكلم فيه أكثر ، لكن ممكن يفك أزمة عن الشخص و هو العمل عن بعد...

الأمور صعبة مع الأسف خصوصا للي توهم متخرجين أو في قطاع خاص ، لكن العمل و التدرب عن بعد قد يفيد بشكل كبير خلال هذه الفترة.

الله يرزق المسلمين و يوفقهم.

 

التوظيف مرتبط بالمشاريع ، وحالياً كثير من المشاريع متوقفة أو الغيت ، نعم ، سوق العمل بعد كورونا لن يصبح كقبل كورونا، اعتقد كلنا رأينا العمالة المتكدسة في السعودية والمفروض الدولة تنظر لهذا الشيء بشكل جدي لاحقاً، نعم هناك سعوديين فصلوا من اعمالهم ، ولكن في نفس الوقت هناك اجانب فصلوا من اعمالهم ايضاً ، وربما الفصل سيطالهم أكثر اذا فتحت المطارات، مما يخلق وظائف أكثر للسعودين ولو بنسبة بسيطة، أعتقد أن أجمل شيء في هذه الازمة انها تفتح عيوننا على القطاعات المختلفة وعلى الشركات، شركات كبيرة باعت موظيفنها ، وشركات احتفظت بهم وحاولت أن تحافظ عليهم ، قطاعات تأثرت وقطاعات تأثرت بشكل أقل.

ولكن الآن السعودي لن يبحث عن الراتب فقط بل سيبحث عن الشركة ذات الأمان الوظيفي الاكثر التي تقدر مواردها البشرية. فلا أحد يريد أن يصحو من نومه في يوم عمل ليجد أنه فُصل من وظيفته.

الآن هو وقت المهارات واثبات النفس، الشواغر ستخلق من جديد والمنافسة ستكون أشد ، فحديث التخرج المتميز ينافس صاحب الخبرة والمهارات ، وصاحب العمل مازال يتعافى من الازمة الاقتصادية، لذلك نعم ؛ حديث التخرج المتميز والمتمكن سيكون له فرصة أكبر نظراً لتكلفته الأقل

علينا جميعاً أن نضع خطط أخرى لأسوأ الحالات، ومنها البحث عن مصادر دخل أخرى والادخار لمثل هذه الازمات مستقبلاً

فنصيحتي لك؛ استغل الوقت ببناء المهارات والبحث والقراءة ؛ لا انصح بالدورات التي هدفها جيبك، طور لغتك اذا كانت غير مرضية ، كون علاقاتك وابحث وأسال الآخرين عن الفرص المتاحة.

 

شركات كثير تضررت .. نعم صحيح !
ولكن في المقابل شركات اخرى زادت مبيعاتها وحاجتها لموظفين جدد .. تطبيقات التوصيل و شركات الاغذية ومصانع المياه وشركات الادوية جميع هذه الشركات ولله الحمد لم تتضرر بل بالعكس زادت مبيعاتها وحاجتها للتوسع !

هذه الازمة كشفت لنا القصور في نواحي عديدة منها على سبيل المثال لا الحصر "الامن الدوائي " ، المملكة الان تدعم وبشكل كبير شركات الادوية لتحقيق الاكتفاء الذاتي ، وايظاً التوسع في الصناعة العسكرية والعقود تبرم بشكل دوري ومنها عقد الطائرات بدون طيار الاخيرة في منتصف رمضان ، اضف الى ذلك ارتفاع اسعار النفط اليوم يعني عودة المشاريع الكبيرة للعمل مثل القدية ومشروع نيوم والبحر الاحمر ، وعودة هذه المشاريع يعني عودة شركات المقاولات والأسمنت واللوجستيك و. و و كل هذه الشركات ستعود باذن الله للعمل !

في بداية الازمة كانت الصدمة ولا أحدٍ يعلم ماذا يستطيع ان يعمل فالكل مذهول كيف توقفت الحياة فجأة ، الان نحنُ في مرحلة التكيف مع الازمة وخلق مناخ جديد للعمل ، العمل من بعد جيد ولكنه لاينفع مع كل القطاعات فالمشاريع لاتبنى عن بعد !

اسال نفسك سؤال : ماذا استفيد لو تحطمت معنوياتي الان !
هل انت في هذه الازمة لوحدك ؟
الحكومة لاترغب في زيادة العاطلين وبالتاكيد ستبحث عن الحلول وباذن الله ستجدها ، ما أضيق العيش لولا فسحت الأمل !

وتذكر ان الازمات تصنع فرص جديدة ، فأبحث عنها.

 

الوظايف موجودة وكثيرة جدا في البلد .. لاتشيل هم .

بس المشكلة كورونا سيمنع المقابلات بسبب منع التجول ومنع السفر ..

الوظائف موجودة ولكن كورونا يمنع المقابلات .

يعني مالك الا تصبر مع نهاية الازمة والله يعديها بإذن الله .

 

الله يصبرنا
كل شي قدامنا مجهول حتى المحاضرات والدورات الاون لاين بالنسبه للمهندسين قليله اومعدومه

انا برضو تخرجت الترم الماضي واموري كلها موقفه الله ييسرها

 

^ تعتبر توك متخرج.. فلا تقلق.. حتى لو مافيه ازمة كورونا
اسم الجامعة والبلد الي متخرج منها ممتازة

خلال الوقت هذا حضر لشهادات احترفية طور من المهارات خذ دورات حسن السيرة الذاتية وقدم على الوظائف المناسبة لك... نتمنى لك التوفيق

 

اختلف معك بخصوص الدورات بالعكس كثرت وعليها عروض وتسهلت صارت اونلاين ويا كثر المواقع المعتمده الي تقدم دورات هندسيه الواحد ممكن يستفيد منها . انا عن نفسي استفدت واخذت دورات عن الRevit + Premavira p6 وبعض الدورات الاخرى عن طريق هدف ولنكدن Learning
من وجهه نظري هي افضل شي الواحد ممكن يسويه بالفتره هذي وبتقوي السيره الذاتيه

 

اخوي صحيت انو في قطاعات اتاثرت بس لا تنسى انو في شركات ازدهرت وكبرت بشكل غير طبيعي
الشركات الي ما اتاثرت بازمة كورونا
1- القطاعات الصحية
2- قطاع التكنولوجيا
3- قطاع الاغذيه
واكيد هذي القطاعات تحتاج توظف لانو الشغل عندها كبر بشكل كبير. لا تفكر بالقطاعات الي خسرت فكر بالقطاعات الي كبرت