تجربتي في مقابلة شلمبرجير ( مقابلى اولى و ثانية )

السلام عليكم جميعا

قدمت على شاغر فيلد انجنير في موقع شلمبرجير بتاريخ 23/10/2022
جاني اتصال في يناير ان عندي مقابلة اولى معا الاستاذ نادر في وادي الظهران للتقنية

كانت المقابلة حبيّة و سهلة و جلسة تعارف و سوالف اكثر من انها مقابلة

طلب مني اتكلم عن نفسي و عن تجرتبي بالجامعة, و اذكر لي حالة كنت فيها تحت ضغط و قدرت تتصرف, و وين سافرت و ايش تسوي في وقت فراغك, و هل عندك مشكلة تشتغل بالفيلد؟ ركز لي جدا على هذا السؤال و كرره علي اكثر من مرة عشان يتاكد اذا عادي اشتغل بالفيلد او لا. سألني كذلك اذا انا متزوج او ناوي اتزوج قريب, ب اختصار يبي واحد متفرغ انه يكون بالفيلد. قاللي بيجيك خبر بعد اسبوعين و انتهت المقابلة.

بعدها جاني ايميل ان عندي مقابلة ثانية في بداية شهر مارس معا قسم IDS

حضرت امام لجنة مكونة من 7 اشخاص, 6 مهندسين و رئيس القسم

تكلمت عن نفسي بالبداية و ركزت لهم على اني اعزب و مو ناوي اتزوج بحيث اوريهم اني متفرغ للعمل, و ذكرت اني احب السفر بمعنى ما عندي مشكلة ابتعد عن اهلي او ديرتي لفترة طويلة. تكلمت عن تعليمي و تطبيقي و مشروع تخرجي كذلك ثم ابتدت اللجنة تسألني

ايش تعرف عن شلمبرجير؟
اذا جاك عرض افضل من شركة ثانية هل راح تقبل فيه؟
ايش هي المخاطر اللي يواجهها الفيلد انجنير بالفيلد؟
ايش هي مهام الفيلد انجنير؟
هل عندك مشكلة لو طلبنا منك انك تشتغل بالهند مثلا؟
ايش الفرق بين ارامكو و شركات الطاقة؟
شركات الطاقة نفسهم ايش الفرق بينهم؟
اذا طلب منك موظف ارامكو تسوي شي خطا هل راح تسويه؟
اذا تهاوشت معا موظف ارامكو و الحق معاك كيف راح تتصرف؟
اذا في قطعه اختربت كيف راح تتصرف؟ هل راح تصلحها بنفسك او تنتظر فريق الصيانة يجي ؟ او هل بتوديها الورشة للصيانة معا ان الورشة بعيدة 400 كيلو مثلا؟ طبعا الجواب هو انك تتبع سياسة الشركة, ممنوع تتصرف بالقطعة على هواك و اذا بتوديها للورشة راح ياخذ وقت و هذا الشي يكلف الشركة.

انا كان في فترة بعد تخرجي ما اشتغلت فيها ف ركزوا يعرفون السبب, و ليش كذلك ما اشتغلت بالشركة اللي طبقت معاها, قلت لهم اني قدمت و ما توفقت, سألوني اذا كانت تجيني عروض و انا ارفض قلت لهم لا.

كان في بعض الاسئلة التقنية كذلك مثل

what is the difference between a syncline and an anticline
what are the types of pressure
what is the procedure of drilling a new location
what is the bottom hole pressure

طبعا اسئلتهم التقنية تعتبر جدا سهلة و بيسك بالنسبة لتخصصي ( هندسة بترول ) ف بناءاً على تخصصك راح تكون الاسئلة, اعرف شباب سوو مقابلة معا اقسام مختلفة ما جاهم ولا سوال تقني واحد ف تختلف التجربة من شخص الى شخص.

في النهاية سألني اذا عندي اي اسالة, سألته السكول وين راح تكون و ايش برنامج تطوير الموظفين الجدد اللي عندكم و ايش نوع العقد هل دولي او خليجي او محلي

قاللي بنتواصل معاك بعد 10 ايام عمل في النهاية, انا حاليا و انا اكتب الموضوع صار لي 9 ايام عمل و الى الان ما جاني شي

مهم جدا انك ما تظهر اي جانب خوف او ضعف اثناء المقابلة, حافظ على ال eye contact و خل صوتك رفيع و خذ وقتك بالتفكير قبل كل اجابة

للأمانة المقابلة كانت صعبة لكني الحمدلله كنت قدها و كنت واثق من نفسي, حتى المانجر قاللي i like your CV بالنهاية

اتمنى اني افدتكم و لا تنسوني من دعائكم