جولة في الترانسكربت :: ورحلة رفع المعدل الى فوق 2 تجربة رائعة من ورننق2 الى فرست اونر

السلام عليكم ورحمة الله وبركاته

اخوكم بدر يفصح عن اهم اسرار حياته وهو الترانسكربت

لكن بشكل مختلف ... لأني والحمد لله اجد فيه انجاز بعد سقوط رهيب

ولطالما تذكرت الكلمة ( الضربة الي ما تقتلك تقويك)

باختصار : النوم الزايد والطلعات وصرف الوقت في الاهتمامات الجانبية (غير الدراسه)

اصلا الدراسة ما كان لها اي اهتمام سوى اننا نقضي عدد من الساعات المطلوبه للأنتقال

للمرحله التي تليها ... ونتخرج ونمشي واحنا مغمضين ما ندري فين رحنا ولا احنا شفنا مين!!

في ترم 081 حصلت الطامة الكبرى مثل ماهو مبين في الترانسكربت
رسوب في الفيزياء
وورننق 1
معدل فصلي اقل من الواحد (مصيبة)
المكافأة انقطعت
================================
في هذي الحاله "توقعت" انه يجب عليّ ان احصل على معدل فصلي في الترم التالي 082

اعلى من 2 ... .... .... جبتها ...معدل فصلي فوق 2 وتراكمي 1.659

ولكن تفاجأت بوجود وورننق 2 والمكافأة استمرت مقطوعة لترم آخر حسبنا الله ونعم الوكيل

طبعا هنا خطأ من الجامعه وهي انها تقول لك " مبرووك حصلت على وورنق" طيب وبعدين؟؟

ايش المفروض اسوي ؟؟ هذي انتا لازم تكتشفها بنفسك وتخمن وتحصل على مصائب اخرى.

رحت لعميد القسم وسألته .."ايش الواجب علي اسويه؟؟ " قال :" رح للتوجيه والارشاد وهم راح يقولون لك"

سحبت عليهم كلهم واعتمدت على الله ثم على نفسي..


في الترم الماضي 091

سألت احد اخوياي الدوافير ... وقلت له " فيه واحد حصل وورننق 2 ... ايش راح يصير له ؟؟ "

قال وبكل تأكد من المعلومة :"اذا ما يرفع معدله التراكمي فوق 2 فراح يفصل فصل نهائي من الجامعه

ولن يقبل في اي جامعه اخرى ابدا.

.
.
.
.
.
رحت الغرفة وبكيت

وبكيت

وتخيلت احلامي الي رسمتها من اول ابتدائي تبخرت

واتخيل اني راح اعيش مثل اي انسان عاطل يبحث عن وظيفة بالف او الفين

ايش راح اقول لأهلي الي يتفاخرون فيني ويقولون ولدنا بالبترول ؟؟؟؟

عشت الارهاب الحقيقي

وقتها ... جزمت ووعدت نفسي اني لأستخرج طاقاتي وارفع معدلي فوق 2

مغامرة ومجازفة .... اخذت الآلة الحاسبة

وفتحت الترانسكربت ... وبديت احسب كم هو الحد الاقصى لرفع المعدل فوق 2

وجدت اني لازم اجيب B+ (بي بلص) في كل مادة..

حكيت راسي .. لأني اعلى درجة جبتها في الجبل هي سي بلص

قلت في نفسي ... انا ما ابي احصل على بي بلص وبس

انا باجيب اي بلص في كل المواد واحصل معدل فصلي =4

عزمت على هذا الشئ

وبدأت الرحلة... في هذا الترم...

يتبع...​

هذا هو الترانسكربت
قولوا ما شاء الله



طبعا عرفت في نهاية الترم ايش راح يصير لو جبت اقل من 2 ... بس خويي عيشني ارهاب بمعلوماته البايخة
في هذا الترم نزلت 18 ساعة وباذن الله راح تكون افضل من هذي النتائج
وبالنسبة للبي اي انا ما ادي كيف الواحد يحصل على اي بلص ... الله يعين

 

بسم الله

اشكر كل من شارك ورد على الموضوع ... والله يوفقنا واياكم

طيب ... الكل يتوقع اني عشت ترم صعب وقاسي و منعزل في كهف ما اعرف الا الكتب

بأقول اني استمتعت بالترم الماضي اكثر من اي ترم اخر

لأنه ما عندي هم دراسي ... بمجرد ما اسمع بان عندي هوموورك او كوز على طول اخلصه حله ومذاكرته وارتاح.

طبعا كنت اخرج في الاسبوع مرتين مع روميتي للعشاء خارج الجامعة.

سافرت في اجازة منتصف الترم و اخذت كتبي معي ولم اذاكر ابدا (كالعادة في كل اجازة)

كنت احيانا اسهر الى الساعة 1 او 2 او الى الفجر (لأن دوامي كان يبدأ 10 ) لكن الشئ

الي لازم انجزه فاني انجزه ثم افعل ما يحلو لي

و اكتشفت ان التفوق يكمن في 4 اشياء :

1- اسبق الوقت والمدرس وخلص المتيريال قبل الميجر بفترة وابدأ تمرن على حل الاسئلة.

2- حاول ان تحضر الدرس قبل ان تأخذه وهذا راح يكون تلقائيا اذا اتبعت الخطوة الاولى.

3- لا ترضى بأقل من الفل مارك في الكوزات والهوموركات وذاكر للكوز مذاكرة ميجر.

4- لا تغيب ابدا ( انا الاترام الماضية كنت لولا مساعدة المدرسين لأخذت اكثر من dn في الترم الماضي غبت فقط غياب واحد
وحضرت مع سكشن اخر لألحق على المعلومات ولكن المدرس حسبها غياب )

وبس
================================================

استفد من وقتك وخاصة الويكند ... الخميس والجمعة لا تفوت ابدا ابدا ابدا

فلها يوم الاربعاء ... الربوع لك ... لكن الخميس والجمعة مالك فيها دقيقة كلها مذاكرة .

وخلال الاسبوع كل يوم ذاكر مواد اليوم الذي يليه 3-4 ساعات في اليوم كافية بس لازم

تكرف في الويكند وتخلص كل الي اخذته في الاسبوع.

اذا حصل لك ظرف فات عليك ويكند ... فراح توزع شغل الويكند في السبت والاحد والاثنين .
================================================

هذي اغلب الاشياء الي سويتها وراح اسويها في هذا الفصل ...

ووالله اني احس بمتعة ... وراحة بال ... وصار الاونر شئ عادي .


شكرا للقراءة