هل انت اوريا جديد, هل انت متردد بعثه او بترول او ارمكو؟؟ اذا ارعص هنا

بسم الله الرحمن الرحيم
احر التهاني واعذب التبريكات لكل من تم قبوله بهذا الصرح الشامخ جامعة الفهد
واسعد الله اوقاتكم وملأها باليسر والبركات
اعزائي الاوريات 2008 حبيت اني اقدم لكم تجربتي البسيطه يوم انا كبركم اوريا << وش عنده الشايب لا يكثر تراك 26 لاعطيك بوقس
طبعا للتنويه بعد ما شفت مواضيع كثيره مشابهه للحاله الي مريت فيها اجتمعت مع نفسي اجتماع سري ومغلق وكثرت المباحثات بين الطرفين وخرجت بالنتيجه الا وهي اني اكتب موضوع متواضع عن حالتي قبل لا انقبل بالجامعه وبعد وا انقبلت واول الايام بالجامعه وحالتي الان بعد ما انهيت الاوريا والفرشمان
وطبعا ارحب بأي مداخله من الاخوان ممن لهم خبره اكثر مني وممن لديه أي ملاحظه او نصائح فالمقصد من هذا الموضوع ان تعم الفائده للجميع
نبدأ على بركة الله وارجو من الجميع ربط الاحزمه استعداد لبدء الرحله
-ايام الثالث ثانوي وما ادراك ما هي ثالث ثانوي طبعا كانت الاختبارات من الوزاره و كنت مسوي حالة استنفار بالبيت واحس اني اقوى واحد بالعالم واذكر وسط الاسبوع والويك اند وما فيه طلعات مغير قاعد بالغرفه ومذاكره استعدادا للاختبارات
طبعا كل هذا عشان احقق حلمي الي مزعج فيه كل الي اعرفهم الا وهو اني ابدرس هندسه بأمريكا تبع ارامكو وما كنت معترف بالجامعات الي بالسعوديه ومسوي لي حزب انا وعيال عمي التوأم ما فيه دراسه الا بأمريكا واحس اني لو ما تحصل لي البعثه بنتحر او بيجيني هستيريا او ما شابه وكل ما شفت امي وابوي اقولهم يالله ناظروني الحين اليين ما تملووون عشان كلها كم شهر وانا مسافر ان شاء الله << وطبعا هم ما يبغون لكن انا براسي حب ما طحن وكم مره حاولو يقنعوني لكن عنيييد

عدت الاختبارات على خير والحمد لله نسبتي كانت فوق 96% والقدرات 84 وباقي التحصيلي طبعا في هذا الوقت كان وقت التقديم على الجامعات وخويكم من النوع الي ما يحب يضيع على نفسه أي فرصه ويحب ياخذ الاحتياطات فقدمت على كل ما وقعت يدي عليه طبعا طموحي زي ما قلت لكم هو اراامكو وما ابغى غيرها طبعا اخترتها لان سمعتها قوويه وكنت اتخيل ا ن الي يشتغل بأرامكو اسعد واحد << فلوس وسمعه صحيح فيه كرف لكن انا ما عندي مشكله نرجع للموضوع
قدمت عن طريق النت على ارامكو , سابك , البترول , برنامج الملك عبدالله للابتعاث , الملك سعود(طب) , الجبيل الصناعيه ,
لاحظوا الي تحتها خط راح تكون من اولوياتي لانها بأمريكا وبالنسبه للطب ما كنت مخطط لها ابداااا بس كذا عباطه
طيب وش باقي الحين باقي التحصيلي اختبرنا التحصيلي وكنت على اعصابي لدرجه اني دايم افكر واهوجس وما ادري الا خاش عرض بأحلامي وان نايم يعني حالتي ما يعلم فيها الا الله وانا متأكد انو كثير من الطلاب مروا بنفس الحاله من جد اذا قالوا على اعصابك وكثير من المواضيع بالمنتدى اقراها نفس حالتي بالضبط.
طلعت درجت التحصيلي ولله الحمد والمنه كانت 80 شكرت الله على هذي النعمه وما انسى المكان الي جتني الرساله وهو بالرياض الدائري الشرقي بين مخرج 11 و 10 كانت معي جدتي بوديها من بيت عمي لبيتنا انا من سمعت صوت الرساله وقلبي بدا يقول قرقع قرقع لاحظوا الحاله كنت اسوق وفي الدائري وانواع الزحمه واقرا الرساله ومن الوناسه والله مدري وش اسوي << واحد من العيال بغى يغير صدام الاكسنت الي قدامه , احمد ربك اكسنت مب BM ولا كان بعت سيارتك عشان تسوي الصدام , اقول كمل الموضوع وبلا خفة دم شكلك تبي تصفق انت , لا خلاص بكمل
المهم ما ادري وش اسوي من الوناسه وادخل المخرج 10 << حلوه ادخل المخرج بس لا تعيدها لاصطرك
واحب راس جدتي و نسيت اني بوديها لبيتنا فرحت رجعتها بيت عمي من الوناسه ....
طيب الحين ندخل الجزء المهم من الموضوع بالنسبه لارامكو ارسلوا لي ايميل انهم قبلوني مبدئي وحددو لي موعد ومكان الاختبار وكانت سعادتي لا توصف وحست اني ملكت الدنيا
سابك على قولة الشباب طلقوني بالاربع << ارسلو لي اربع رسايل مب وحد ولا ثنتين عذرا لم يتم قبولك..
بس الصراحه ما فرقت معي كثير لان حبيبتي ارامكوا هي المقصد
جامعة الملك فهد قبلوني دفعه اولى ولكن ما كنت حاط في بالي ابدا اني بقدم عليهم
برنامج الملك عبدالله تم قبولي و حددوا لي موعد للمقابله الشخصيه
الملك سعود تم قبولي وحددوا لي موعد للمقابله الشخصيه وتمت مقابلتي وقبولي نهائيا لكن ما عندي رغبه بالطب وسحبت عليهم

طيب وش صار بعد كذا الي صار يا حبايبي اني رحت ارامكوا واختبروني وكان اختبار جدا مرهق لمدة اربع ساعات تقريبا طبعا الاختبار من قسمين انجلش ورياضيات خويكم الله يهديه ويصلحه مش ولا بد بالانجلش او تقدرون تقولون 2من10 يعني منهج الثانوي لا غير فلمن استلمت الاختبار بدت تحول عيوني وما ادري وش الشالفه افاااا هذي اولها كلها طبعا كان اختيارات وكل الحلول كانت حقرا بقرا من 1 حتى 10 , وهذا سؤال اتوقع انو كذا , وهذا شاك في الاجابه << اصلن ولا اجابه متأكد منها
خلصت جزء الانجلش وبديت اختبار الماث وتطلع لي مسائل اول مره اشوفها لكن فيه اشياء عرفتها وحليتها لكن لازلت متحطم من اختبار الانجلش.
طبعا خلصت الاختبار ورجعت البيت وكانت النفسيه تعبااانه مره حسيت ان حلم حياتي بدا يتبخر وحسيت اني غير ناجح بالحياه ومن ذا الخرابيط طبعا في هذا الوقت جامعة الفهد كانوا يستلمون الشهاداة وكانت المده ثلاث ايام.
قمت بتنظيم جلسه عائليه مع الوالد الله يحفظه << قولوا امين ولا منب مكمل , لا تمن علينا بتكمل وانت ما تشوف الدرب , اوكي بس كنت امزح
وللمعلوميه الوالد متخرج من جامعة الملك فهد وعشان كذا هو يحاول يقنعني بالجامعه لانه يعرف قيمتها اما انا فكان همي اني اروح امريكا بأي طريقه حتى لو بالبعثه وكنت حاط في بالي اذا ارامكوا ما قبلتني فما فيه غير البعثه
نقطه اخرى الوالد انسان ديموقراطي << متعوب عليها>> وفاتح لي جميع الخيارات وكان يقول انت الان رجل وانت تحدد مستقبلك ودائما يعارض الوالده اذا كلمتني اني اغير فكرة امريكا << والله ما الومها من الي تسمع وكانت تقول طيب أي دوله بس غير امريكا لكن قلت لكم انسان عنيييد
طلعنا من الاجتماع بالنتائج التاليه : لمن حسيت ان فرصة قبولي بارامكو ضعيفه والنتيجه يبيلها وقت على بال ما تطلع وبرضوا التعليم العالي عطوني موعد بعد فتره طويله اقترح الوالد اني اقدم اوراقي للبترول وعصفور باليد ولا عشره بالغصن<< عاد وش رايكم باللغه>> واذا قبلوني ارامكوا سحبت الاوراق من البترول ورحت الى حلمي ارامكو
رحت لكلية الامير سلطان بالرياض لتقديم اوراقي واذكر انه اخر يوم بالتقديم والظاهر اني اخر واحد عطاهم اوراقي

وبعد طول انتظار اُعلنت نتائج ارامكو ولكن للاسف وكما كنت متوقع لم يحالفني الحظ بسبب ضعف لغتي الانجيزيه ووضعوني على لائحة الانتظار واتوقع هذي للتصريف طبعا حزنت على هذا الخبر حزنا شديدا وحسيت الدنيا قفلت بوجهي
حمدت ربي على كل حال وقلت الخيره فيما اختاره الله وتقلصت جميع الخيارات الى خيار واحد وهو البعثه
اكتشفت ان البعثه شغلتها شغله و القبول شي واستخراج التأشيره شي ثاني وطبعا كان نظامهم مب مرتب يعني تعرف احد تمشي امورك بالوزاره سلام سلام واذا ما تعرف احد وتكون نظامي تنطق وتتاخر لكن انا شخص ما اعترف بالواسطه وكنت رافض رفضا شديدا وقاطعا وبكل ما تحمله الكلمه من معنى انو احد يتدخل في امر قبولي او ما يسمى بالواسطه لاسباب احتفظ بها لنفسي << احلى يا حركااات انت تحتفظ فيها لنفسك , اقول قم بس قم
المهم يا طويلين العمر قربت السنه الدراسيه وما بعد جا لا قبول من الوزاه ولا قدمت على تأشيره ولا هم يحزنون وعرفت ان الشغله بتطول شوي قلت الحمد لله اني قدمت على البترول على الاقل استفيد لغه شوي بدال ما اقعد عاطل باطل

طيب يا حلوين هذا الجزء الاول << ما قبل دخول الجامعه>> عشان ما اطول عليكم وتحسون بالملل انشاء الله بأقرب وقت بحاول انزل الجزء الثاني ويا شباب أي ملاحظات لا احد يستحي اعتبرك في بيتك


تقبلو خاااالص تحياتي ابو غلا​