ومازالت فضائح امن جامعتنا تتواصل ... كذب وتبلي وادعاء في غير محله !!!!!

السلام عليكم ورحمة الله وبركاته

مساكم / صبحكم الله بالخير

ومازالت مشاكل الأمن مستمره في جامعتنا الحبيبه ....!!!

ليش ؟؟ ماادري ...

قبل لاأدخل الجامعه قالولي ... السابقين لي في دخول الجامعه ... بأن هناك مصاصين مكافآت ولكن لم أتوقع لهذه الدرجه .....
وأيضا ... كنت أتوقع انهم يمصون المكافآت ولكن بالحق ... يعني مو بالكذب والاهانه والادعاء على الطلاب .... ولكن اذا كان خصمك القاضي !!! فمن تقاضي ...
يعني لو كنت مخطي مافي مشكله خذوا اللي تبون ... مافرقت الفلوس ... لكن أن تكون بالكذب والباطل ... فوالله لو كان اللي تبون تاخذون منه بيل جيتس بهذا الاسلوب ماراح يرضى .. حتى لو كان المبلغ بسيط 100 ريال
المهم انا كتبت هذا الموضوع لسبب معين اللي هو اذا فيه أحد يقدر يوصلني للمسؤول او يستطيع افادتي عن كيفية التصرف يتفضل ... لاني اوريا واووول سنة ومامرت علي هالسوالف من الأمن من قبل

راح أقولكم السالفه من طق طق لين السلام عليكم

يوم الثلاثاء الماضي ( بالمناسبة يوم الثلاثاء كماتذكرون كان أشد يوم برودة في الأسابيع الماضيه )

المهم كنت انا واثنين من اصحابي خارج الجامعه بالليل ...
رجعنا تقريبا الساعه 1 مساء لان الدوام اليوم الثاني ماراح يكون الا 10
المهم واحد من الاثنين اللي معاي ... كان الايام الماضيه نايم عند أحد أقاربه خارج الجامعه
وكانت معاه شنطة وحوسه وأغراض ...
فكانت معاي بالسيارة ...
المهم يوم رجعنا ... كنت أبي انزلهم بالسكن واطلع من الجامعه لاني انا مو ساكن بالجامعه
قلت خلني انزل الاول راعي الأغراض ... وهو كان ساكن في اللاينات اللي قريبه من الجمعيه من جهة الحزام ... يعني وانت داخل من البوابه الرئيسيه بعد ماتعدي مبنى الاوريا وانت بالحزام هي اوول لاينات تقابلك على يدك اليسار ...
وانا داخل الجامعه ... وقفت انا في الفاصل اللي بين الاتجاهين اللي يكون فيه كمية كبيرة من عيون القطط .... وانا وقفت هناك لاكثر من سبب ... اولا الجو جدا بارد و ثانيا بسبب الأغراض اللي مع خويي ثالثا اصلا مافيه احد تقريبا في الشارع هذا الوقت ورابعا وهو الأهم ... اصلا ماادري انه مخالفه الوقوف في هذا المكان خصوصا اني ماراح اوقف اكثر من نص دقيقه وايضا من يوم مادخلت الجامعه وانا دااايما اشوف الطلاب يوقفون في هذا المكان عشان ياخذون اخوياهم او ينزلوهم
واصلا لو ادري انه مخالفه هذا لو كانت مخالفه بالأصل ماكان وقفت في هذا المكان لاني من مكاني هذا اشوف سيارة الامن بس ماكنت ادري او بالأحرى ماكنت أتوقع
المهم يوم نزل خويي واخذ اغراضه يعني زي ماقلت ماراح يزيد عن نص دقيقه مشيت ...
الا وواحد من السكرتيه اللي كان واقف عند السيارة يطلعلي في نص الشارع ويوقفني وقفت قلت هلا ... قالي عطني اثباتك اانا عطيته الرخصه لانها كانت في جيبي بسبب اني قبل لاادخل الجامعه طلعتها للتفتيش اللي برى .... قالي وقف على جنب داخل اللفه قلت اوكي ...
وقفت ونزلت وجيت عنده .... لقيت واحد قاعد يكتب مخالفه عالكبوت والثاني ينتظرني والثالث بالسيارة قاعد يصيد للطلاب بجهاز الرادار ....
جيت للي اخذ الرخصه وسلمت عليه قلتله خير ياخوي ....
قالي ليش واقف هناك .... شرحتله كل الظروف اللي سبق ان كتبتها لكم ...
وقلتله انا اصلا مااخذت اكثر من نص دقيقه ولو ادري انها مخالفه زي ماتقول ماكان وقفت خصوصا اني اشوفكم من مكاني هناك ....
قالي لا مخالفه .... ومافي امل راح تاخذ مخالفه يعني راح تاخذ مخالفه ... حاولت اعتذر منه واذا مرره ملزم راح آخذ المخالفه وأمشي خصوصا انها ماتسوى يعني كلها 100 ريال ... بس اللي خلاني اعصب وانقهر كلامه لي ....
قالي احنا واقفين وشفناك توقف ... قمنا كبسنا لك النور ... وعطيناك ( بوري ) .... وقمنا نصايح لك ... ونأشر لك عشان تمشي من موقفك هذا بس مامشيت .... انا يوم قال هذا ... فتحت عيوني كذا وانا اقول بنفسي يااني من السهر سرت مسطل او انه هو يبي يطلع حرته والبرد اللي واقف هو فيه فيني .... قلت ياخوي متى سار كل هالكلام ومتى كبستلي وناديتني ؟؟؟ قالي لا انا كذاب يمكن انا كذاب ... قلت انت لاانت كذاب ولاشئ بس متى سار هالكلام ....؟؟؟ قام يسأل خويه اللي معاه قال احنا سوينا كذا ولا لا ؟؟ قال خويه ايه عاد انا اطالع فيهم وماسك نفسي .... رحت عند خويي اللي بالسيارة قلت يمكن سوو شئ وانا كنت منشغل مع خويي الثاني ننزل الأغراض ... قالي لا ماسوو ولا شئ وانا راكب بالسيارة قدام ولا شفت ولا شئ ....
عاد يوم تأكدت ركبت شياطيني ورجعتلهم .... قلتله ياخوي تخليها في ذمتك انك سويت كل هذا ؟؟؟ قال مابخلي طالب مايسوى في ذمتي وانت بتاخذ المخالفه يعني بتاخذها ... بعدين جيب بطاقتك الجامعيه عشان نكمل المخالفه وتاخذ رخصتك ... قلت بطاقتي الجامعيه ماني معطيك ... قال اجل الرخصه راح تقعد معانا الين تسدد المخالفه وتجي تاخذها .... قلت ياابن الحلال استغفر ربك ولا تتبلى علي ... وخلني امشي ... قال مافي ويقطع نسخة المخالفه اللي لي ويعطينيها ... قلت والرخصه ؟؟ قال روح سدد المخالفه وتعال ... قمت انا عفست المخالفه بايدي وقطيتها عنده ... قلت الرخصه خلها عندك ... وباطلع بدل فاقد بدالها وانا اوريك يانا ياانت .... ومشيت ... الا قام يناديني ... قالي انتظر ... قام يكلم بالجهاز اللي معاه الادارة ... وقال عندي واحد يستهزئ برجال الامن وعفس المخالفه وقطها قدامي .... قاله اللي يكلمه نادله الدوريات اللي عند الباب قال طيب .... قالي انا اللحين انادي الدوريات ... وخلنا نشوف رجولتك اللحين يوم تقط المخالفه .... قلت نادها ... الا ويجي عنده خويه الثاني ماادري وش قاله .... قال خلاص جاني خويه الثاني .. وقالي خلاص اركب وماراح ننادي الدوريات ... بس سدد المخالفه عشان نعطيك الرخصه ... قلت حتى انت راضي ان خوويك يتبلى علي ويسبني وتقول روح سدد المخالفه ... قالي خلاص سار اللي سار .... بس روح اللحين الله يستر عليك وبكره الصباح سدد المخالفه ... قلتله طيب عطني اسمك واسم خوويك وبكره انا راح اجي الاداره .... مارضى يقوولي اسمه ولا اسم خوويه قلت خلاص انا اعرف كيف اجيبكم .... وقام يهديني ومدري ايش يقول ويزحلقني بالكلام ... عشان مااشتكيه .. قلت ابيك تقوولي الوقوف بالمكان هذا اللي وقفت انا فيه مخالفه ولا لا ؟؟؟ قالي ايه مخالفه ... قلت طيب تعال وقت المغرب لما يجون الطلاب طالعين من الدوام وشوف كم واحد يوووقف ... ولا حد يكلمه ... قالي انا مالي شغل في وردية غيري انا لي شغل في ورديتي وبس .... قلت هذا آخر كلام عندك .... قالي ايه واحمد ربك اننا مانادينا الدوريه بعد بس راح نكتب فيك تقرير ونرفعه للاداره .... قلت ياخوي خاف ربك انت وياه .... قال خلاص اذا لك حق روح طارد وراه ... ( قالها وهو مبتسم ) المهم انا قلتله هين ومشيت ......

هذي السالفه كلها .... طبعا انا ماانقهرت عشان المخالفه بس زي ماقلت من اووول لما يعطونك مخالفه صحيحه مافي مشكله بس انه يقوم يكذب ويتبلى علي وغصب نكتبلك مخالف لا والله ماحد يرضى في هالكلام .....
وانا ماابي احد يعلمني وش اسوي الا عشان ياخذ هذا جزاه ويرتدع امثاله .... والا لو انا ادوور ع المشاكل كان دوورت عليها مع غيره خصوصا انهم عطوني مخالفة سرعه قبل هذي المخالفه بأسبوع .... تقريبا ع الساعه 9.30 الصباح .... جاي الدوام بدري وانا دوامي الساعه 10 الصباح ... يعني وش اللي يخليني اسرع ؟؟؟ المهم جيته انا ماشي تقريبا حول الـ 50 ويوقفوني مسوين نقطة تفتيش عالحزام مقابل مبنى الأوريا .... المهم انا متأكد اني ماشي في الخمسين زي ماقلت ... وقفت قالي اثباتك ... عطيته .... قالي امسك هذي مخالفه انت ماشي 62 قلت ياشيخ انا ماشي حول الخمسين ومتأكد ... وبعدين هي وحده من الثنتين ... اما طبلون سيارتي خربان وانا مااتوقع هالكلام لان سيارتي مالها 3 شهور من يوم طلعتها من الوكاله ... او ان راداركم خربان .... قالي مو شغلي وش الخربان ... انا مأمور من الرادار اني أوقفك ... فوقفتك لانه راح تجيني مسأله بعدين عنك ليش ماوقفتك .... انا يوم شفته كذا قلت مافي مشكله كلها 100 ريال بس الله لايسامح المخطي سواء انت او اللي راكب في السيارة ومعاه الرادار ...

هذي زي ماقلتلكم سالفه سارتلي قبلها باسبوع بس ماكنت ابي المشاكل ... لاني حسيت ان البلى مو من اللي وقفني البلى من اللي معاه الرادار ... فمشيت وخليته ...

اما اللي وقفني عشان الموقف هذا لارادار ولا يحزنون هذا يكذب ويتبلى عالطلاب ... غير انه يقول ( مابخلي طالب مايسوى في ذمتي )

انا بغيت اروح للأمن يوم الأربعاء بس المشكله اني مااأعرف أتصرف في مثل هذي المواقف لانه ماعمري مر علي مثل هالموقف ... وكل ماقلت لأحد من اخوياي سالفتي ... يقولولي والله انك طيب ... يقولك كل هالكلام وانت بس قطيت المخالفه لو غيرك كان سوى عفسه ورفسه ...

وانا ابغى اي واحد يقدر يوصل مشكلتي هذي للمسؤولين يتفضل ... او يعلمني عن طريقة الوصول لهم .... أو طريقة التصرف في مثل هذي الحالات ... خصوصا .. ان السكرتي هذا كذب وتبلى علي قدامي فماهو غريبه انه يقول كلام ماسار بالأساس ويتبلى علي زيادة واأطلع انا المخطئ ... واللي كانوا معاي بالسيارة يشهدون على كل كلمة اقولها ... المهم انا أبي اي طريقة توصلني للمسؤول خصوصا اني مااسمع عن الدكتور ناصر الخليفي الا كل خير ... بس انا ابي اللي غلط علي ياخذ جزاه ويكون عبرة .... ولو بغى أسدد المخالفه ماعندي مشكله بس اهم شئ المخطي ياخذ جزاه ....

هذا اللي عندي وحبيت اني اكتبه في هذا المنتدى لعل وعسى القى حل لمشكلتي ...

والسلام خير ختام ​

​

 

مشكور اخوي واصل ع الافاده ....

بس اللي فهمته من كلامك ... اني مااروح واقضب ارضي احس لي ...!!

ولا كيف ؟؟

 

الله يسمع منك اخوي oria4ever

واملي في الدكتور ناصر ان يرد لي حقي كما سمعنا عنه ....!!!

بس سؤالي كيف اوصل للدكتور ناصر ؟؟
وهل اذا عرفت مكتبه راح يسمحون لي بمقابلته ؟؟

 

يعطيك العافية ....
وباذن الله أجد التجاوب ...!!

 

يعطيك ربي ألف عافية ... والله يسعدك زي ماافرحتني ...
وباذن الله يوم السبت أو كحد أقصى يوم الأحد راح اكون متواجد عند الدكتور ... لأني حاليا سكني بعيد عن الجامعه ... والله ييسر الأمور

 

اووول شئ مشكووور على ردك

ثاني شئ .... في فرق بين انك تووقف في نص الشارع .... وبين انك توقف في مكان من يوم دخلت الجامعه وانت تشوف الناس يوقفون فيه سواء ياخذون احد او ينزلون احد والامن دااايما يمر من جنبهم ولا يقوولهم شئ ...

ولو كان ممنوع ... انا لما اشوف الناس يوقفون والامن يمر من جنبهم يكووون الحزااام زحمه بمعنى الكلمه يعني يكون وقت خروج الاوريا من الدوام ...

وانا يوم وقفت ماكان فيه ولا احد ذاك الوقت واكاد اجزم اني ماشفت ولا سيارة من يوم وقفت لين خلصت سالفتي مع السكورتي ...

وانا زي ماقلت ... المشكله مو في المخالفه ... يعني السيناريو اللي كان مفروض يسير في مثل هالمواقف ... كالتالي ...

يوقفني السيكورتي .. ويقولي ليش وقفت هناك ... وانا راح اشرحله الاسباب ... اذا اقتنع وكان طيب يقولي لاتوقف هناك وامش ... واذا مااقتنع ومصمم انها مخالفه يعطيني مخالفه وانا راح امشي ونفسي راضيه ولا راح اقول ليش لانه بالاصل مخالفه ...

اما انه يجي ويكذب ويتبلى علي ويقلل مني .... ويستهزأ فيني ... ويعد يهددني بدوريه ومدري ايش ... فهذا اللي ماارضاه ولا احد فينا يرضاه ...

عرفت قصدي من الموضوع كامل ... اتمنى انك تكون فهمت قصدي والسلام

 

يعطيك العافية اخوي سويت عالرد ...

وزي ماقلت المشكله مو في المخالفه ...
المشكله في الأسلوب المتبع معاي ومع اغلب الطلاب ....