مذكرات طالب أوريا .. !

ــ مذكرات طالب أوريا .. ( 2 )

قصة اللغة الإنجليزية ..


من خلف مجمع الراشد أخذنا تاكسي إلى جامعة البترول .. بصراحة كنت متحمس رحت " مشخص " ولابس شماغ وعقال على بالي إنهم بيصوروني .. بس للأسف ما كان فيه تصوير .. خلصت من عندهم ورحنا اختبرنا "توفل" ..
اختبار التوفل هذا كان تحفة لحاله .. جلست على الكرسي ودخل علينا بريطاني ما دريت وش يقول لكني فهمت في النهاية إنه لا تحل أي كلام لأنهم راح يزيدونك كلاس إنجلش إذا كانت درجاتك مرة نازلة .. !
طبعاً أنا متعود على إختبار الإنجليزي حق الثانوي .. تدخل الإختبار وانت عارف وش راح يجي وكل حاجة مؤشرة في الكتاب .. بدأ اختبار التوفل بالليسنينق وأنا ما دريت وش يقولوا إلا حاجة وحدة : What does the man mean ?!

ما بقيت ولا دايرة إلا ظللتها .. والإختبار كله من بدايته ألين نهايته ما فهمت منه غير فقرة وحدة والظاهر إني حليتها غلط ! .. المهم سلمت الإختبار وطلعت وأنا أقول شكلي حليت تمام !!!
الجميل في النهاية إنهم زادوني ساعة مع الناس إللي زادوهم وصرت أدرس خمس ساعات في اليوم انجلش ..!
لم تنتهي قصة الإنجلش بعد .. نزلوني عند مدرس تحفة.. هذا المدرس بعد مرور أسبوعين على بداية الدراسة وقف قدامي وقال :
ـ انت راح ترسب في الإنجليزي !!!!
ـ ـ طيب ليه ؟!
ـ لأن مستواك في اللغة ضعيف .. والأفضل إنك تعيد السيميستر ..!

طبعاً أنا ما أدري كيف أقوله راح أشد حيلي وإن شاء الله أعدي مدري كيف أشرح له .. كنت أقول no ... I want to pass
وبصراحة هذا الموقف جاب لي صدمة وعلى قول واحد من الشباب " انكسار عاطفي داخلي " وتحطمت وحسيت إني بجيب العيد وإن ما في مستقبل في هذي الجامعة ..
طبعاً هذا " الشعور " ممكن يجيك من أي موقف في الدراسة " كلام دكتور " أو " ميجر تجيب فيه العيد " أو حتى " خلاف مع روميتك " ..

بصراحة كلام الأستاذ كان بمثابة " نار " لكنها لم تحرقني بل أشعلت فتيل الإجتهاد .. قررت أن أري هذا البريطاني ( إللي مسوي أبو بُعد نظر ) كيف تورد الإبل ..!
بدأت أهتم باللغة الإنجليزية وخاصة الكويزات الأسبوعية كنت أذاكر لها " مزبوط" وأروح أختبر وكنت أجيب درجات حلوة ولله الحمد ألين غير البريطاني رأيه فيني ولله الفضل ..
بما إن الكويزات كانت أسبوعية كانوا الشباب ما يذاكروا لها تمام لأنهم يفكروا إنه لو ما جات تمام هذا الأسبوع راح أعوض في الأسبوع الجاي .. وإختبار ورى اختبار وبعضهم جاب العيد ..! خاصة لأن المادة ( حسب نظام تلك السنة ) تعتمد على التقويم المستمر بشكل مرة كبير .. والقليل من الدرجات على المياجر والإختبار النهائي ..

خذها بإختصار .. مادة مثل الإنجليزي أربع ساعات يومياً والمادة تعتمد بشكل كبير على التقويم المستمر لازم تهتم بالمادة كثير ..
ليش تهتم ؟!
لأن اللغة الإنجليزية مو الهدف إنك تعدي المادة اللغة راح تفيدك كثير في السنوات القادمة وهي ستكون سبب قوي لكي تحصل على درجات مميزة .. الأمر الآخر .. لمن يشوفك المدرس إنك مهتم وما عليك ملاحظات في الكلاس ما راح يقصر معك ( غالباً ) .. طبعاً أنا أكره أسلوب " التشبيك " و" التسليك " بالكلام .. لكن إن كان اجتهادك وقدراتك ستبهر من حولك فالأمر مختلف ..

ولله الحمد بنهاية الترم كان مستواي في الإنجليزي تمام .. وتغيرت نظرت الأستاذ لي .. وكنت أتحمس أحياناً وأقول للشباب في شي منتم فاهمينه ... !



المذكرة القادمة .. قصة أول كلاس ماث !

 

منور الموضوع يا محمد ..

بصراحة موضوع " التحطيم" حصل معي مثل ما ذكرت وسمعت إنه حصل مع كثير من الطلاب وأذكر إن أحد الطلاب في " دفعتي " سحب من الجامعة من أجل مدرس قاله كلام مثل كذا ..!

( وهم يضحكوا آخر الترم ) << يا سلام عليك أنا أحب هالعبارة وهي أكثر شي يصبر الطالب على الصعوبات إللي تمر عليه في السنة التحضيرية ..

شكرا على متابعتك

 

حياك الله أخوي ..

عبارة جميلة ( من يضحك أخيراً .. يضحك كثيراً ) .. واللغة الإنجليزية حجر العثرة لكثير من الطلاب عن التميز والسنة التحضيرية فرصة ذهبية لرفع مستوى اللغة ..
بالنسبة " للكلام " .. التحدي في الكلام يكمن في قضية " توارد " الكلمات بسرعة في الذهن .. يعني ممكن الواحد فينا وهو قاعد يقدر يتخيل إنه يقول كلام بالإنجليزي وتجي معاه تمام يعني عنده مرادفات كثيرة .. لكن لمن يبدأ يتكلم مع شخص آخر بشكل حقيقي يجد أن الكلمات لا تأتي معه .. وربما بعد الموقف هذا يقول في نفسه لو إني قلت الكلمة الفلانية كان أحسن أو الجملة الفلانية ..!

طيب وش الحل ؟!
الحل .. إنه الواحد يتكلم ! .. ما هي مشكلة حتى لو أخطى الواحد .. أذكر إن كل مرة تكلمت فيها مع أستاذ الإنجلش وردني في قرامر .. ما عاد أخطيت فيه ( على الأقل مع نفس المدرس ) .. لأن الخطأ يمسك على طول !
وفي فكرة أنا أطبقها .. أحيان أجلس أفكر إني أناقش واحد بالإنجليزي .. وأحاول أقنعه وكأنه حقيقي .. والكلمات أستخدمها مع القرامر الصحيح .. هذي الطريقة فادتني كثير ..

سعيد جدا بمتابعتك .. وكويس إنه بيننا أشياء مشتركة ..

والهدف راح تحققه بإذن الله .. وعسى الأونر فالك يا رب ..

 

غريب لكن ذيب .. الدحمي ..
أشكر لكم المتابعة .. عدد جديد إن شاء الله كل يوم جمعة واثنين ..

 

زمان والله على الفشار .. !
تسعدني طلتك

 

مذكرات طالب أوريا ( 3 )

ـ أول كلاس ماث ..!

أذكر إن أول كلاس رياضيات حضرته لدى أحد الأساتذة الجزائريين .. بإختصار ( ما عرفت وش يقول ..) !!
طبعا في جامعة البترول الدراسة من أول كلاس .. والمحاضِر حقنا متحمس عرّف بنفسه ووزع السليبوز حق المادة وبسم الله صكنا بذاك الشرح الإنجليزي !
وأنا ما شاء الله عليه تحفة .. عمري ما سمعت أحد يتكلم إنجليزي ولا حتى في فيلم !
وحتى مدرسين الإنجليزي في الثانوي كانوا يشرحون لنا بالعربي .. وهذا ما شاء الله عليه طلقة انجليزي ..!
المهم .. تقريبا عدا الأسبوع الأول كامل وأنا مفتح عيوني على أكبر حجم مع المدرس ومدري وش يقول .. هذا الأمر إكتشفت إن كثير ( وليس أكثر ) من الشباب نفس الحالة ..!
طيب والحل ؟!
الحل إنك لمن ترجع بعد الدوام وترتاح وتنام وتصحى وتشرب شاهي .. تفتح النوت حق المدرس وتبدأ تراجع الأشياء المكتوبة وتفهّم نفسك الشي إللي كان ينقال في الكلاس .. حبة حبة راح تتعود على اللغة الإنجليزية في الشرح وراح تتعود على اللهجات المختلفة ..

جو الثانوي ( في أغلب المدارس ) بإختصار كبّر المخدة ..! وقبل الإختبارات النهائية بأسبوعين ( وبعض المدارس ما تحتاج أسبوع حتى ) افتح الكتب وابدأ مذاكرة !!
هذا الشي للأسف ما ينفع في الجامعة لأن كمية الأشياء إللي تدرسها كبيرة .. والناس إللي تشتكي من صعوبة السنة التحضيرية ( في الغالب ) إنه قاعد يطبق قاعدة " كبّر المخدة " حقت الثانوي .. والدليل إن السنوات اللتي تلي السنة التحضيرية أكثر صعوبة لكن الطالب يجد نفسه قد تعود على جو المذاكرة المستمرة ..
وفي الماث خصوصاً علمتني الجامعة قاعدة بسيطة ( حل أكثر تفهم أكثر ) .. بقدر ما تحل مسائل متنوعة بأفكار مختلفة كلما أصبحت أكثر قدرة وسرعة لإستنتاج طريقة الحل وايجاد الجواب الصحيح بإذن الله ..

ملخص هذي المذكرة :
ـ ذاكر أوّل بأوّل ولا تأخر شي ..
ـ انسى جو الثانوي وتأقلم مع الجو الجديد للمذاكرة ..
ـ حل أكثر تفهم أكثر ..
ـ التميز لا يأتي بدون مقابل !

 

مذكرات طالب أرويا ( 4 )

ـ وش تبي ؟!

أول يوم كملنا فيه اجاراءات القبول في الجامعة أخذونا بالباص لمستودع الكتب .. وأخذنا مجموعة من الكتب >> المعمل ( الوورك شوب ) لحاله له تقريبا أربعة كتب .. أنا أعطوني الأربعة كتب حقت المعمل وكتاب مادة الحاسب وفرحان فيها أحسب إنها حقت كل المواد ..
المهم .. بعد كلاس الماث عرفت إن الهرجة لازم أروح أستلم كتاب الماث من مستودع الكتب عشان أقدر أحل الواجبات على الأقل .. وأخوكم ما عنده سيارة ومستودع الكتب مشوار وأنا توي ( أوريا ) ما أعرف أحد .. وأطلع من كلاس الرياضيات الساعة 11 في قلب الشمس والجو حار ( في الصيف ) وشايل كتب الإنجليزي ( أعطونا اياها في الكلاس ) في شنطة على الكتف .. ومشي يحبوا قلبك من مبنى الماث ألييييين مستودع الكتب .. طبعاً أنا ما أدري وين مستودع الكتب فرايح مع الخط حق السيارات بدون اختصار ولا شي ..!!
وكل ما شفت واحد أسأله وين مستودع الكتب ..! ومشي ألين المستودع .. وأنا انسان ما تعودت على المشي وخاصة في الشمس ..

وصلت المستودع .. فتحت الباب .. دخلت ما عاد أشوف شي .. عطيت الموظف رقمي الجامعي .. طبع لي ورقة مكتوب فيها بس كتاب الرياضيات ...!
قلت له أنا عندي ( بي اي ) وأبي الكتاب حقه .. قالي والله مو نازل على السيستم وما أقدر أعطيك اياه .. قلت له تكفى .. قالي ما أقدر .. شافني واحد من المسئولين في المستودع قال وش فيك ؟
قلت له الهرجة .. قال طيب روح للمدرس وخله يضيفك وبعدين تعال .. قلت له والله مشوار وأنا جايكم مشي .. !
قال طيب .. دخل سواها على الكبيوتر وأعطاني الورقة << جزاه الله خير ..
ورجعت مشي أبشركم ..! رغم إنه كان بالإمكان أستخدم الباصات على الأقل أختصر جزء من المسافة .. بس إني طالب جديد ولا أدري وين الله حاطني !

بس بصراحة حبيت بعدها كتاب الرياضيات هذا .. لأني تعبت عشانه .. !

ـ وش تبي ؟!
السؤال هذا مهم للغاية .. من جد وش تبي ؟!
ليه انت هنا .. ليه جيت الجامعة ؟!
حدد الهدف من وجودك .. إذا كان هدفك غير واضح فلن تصل لشي ..
فكّر في مراتب الشرف .. فكر في الـ A+ .. فكر في التخصص الحلو ..
حط لنفسك هدف إنك تحققه ..
ليه الهدف ؟!
لأنه ممكن تجي عليك أيام تنام فيها أربعة ساعات فقط .. لأن اليوم الثاني عندك اختبار وواجب لازم تسلمه .. هذا السهر راح تجد له دافع لأن عندك هدف .. لكن بدون هدف راح "تكبر المخدة "
ممكن تقول .. طيب أنا ماني دافور ؟!
والطلاب الثانيين عندهم معلومات وأساسيات من أيام الثانوي ..!
كلام جميل ..!
السنة التحضيرية كلها بداية من الأساسيات .. يعني انت ما تحتاج معلومات ( كثيرة ) من أيام الثانوي عشان تبني عليها الأشياء إللي قاعد تدرسها الآن .. لو كانت موجودة عندك راح تختصر لك الجهد .. لكن لو إنها ما هي موجودة ما هي مشكلة كلها راح تتعلمها من خلال السنة التحضيرية لكنك بحاجة إلى جهد ومثابرة ..
السنة التحضيرية ليست صعبة ( بذاتها ) لكن إختلاف بيئة الثانوي عن بيئة الجامعة أحد أهم الأشياء التي تجعل السنة صعبة ..

سأتحدث في المذكرة القادمة عن طُرق التعلم في الجامعة والـ " self study " .. بإذن الله

 

مذكرات طالب أوريا ( 5 )
( المذاكرة )

أكثر كلمتي انتقاد سمعتها في السنة التحضيرية " الدراسة صعبة " و " المدرس ما يعرف يشرح " !
حنا دايماً نقارن الأشياء القديمة بالأشياء الجديدة .. فنطلع بنتيجة صعبة .. يا ماضينا سيء يا واقعنا .. وفي كلا الحالتين لن نخرج - في كثير - من الأحيان بفايدة .. !
الفرق بين التعليم في الثانوية والجامعة مختلف إلى حد كبير .. المحاضِر في الجامعة غالبا يشرح النقاط الرئيسية فقط وعليك انت إكمال الباقي .. ليس كمدرس الثانوي إللي " يخطط " و " يلخص " ويعطيك مذكرة آخر الترم يقولك الأسئلة ما تخرج منها !

أذكر أول اختبار ميجر حق الماث .. جاني واحد الغرفة وشافني أذاكر .. أمممم تقريباً قبل الإختبار بأسبوع.. هو ( أحد طلاب الجبل ) .. قال : ما شاء الله شاد حيلك من بدري !!
ترى ما يحتاج الإختبار مرة سهل .. فك مذكرة أيمن قبلها بيومين وحالك طيب ..! ولا تنس الأولد اكزام مر عليه وحل كم سؤال وفالك 17 - 18 .. ودامك قاعد تذاكر من ألحين فالك الفل مارك !!
والله أنا حمسني الكلام هذا وقلت بس الاختبار سهل وما يحتاج ..
ذاكرت على خفيف على أساس إن الإختبار سهل .. ويجي الإختبار وأشوف الإسئلة وأقول : ( يا لهوي ) << ضاعت اللهجة هع !
المهم جاتني النتيجة متدنية جداً .. وقلت الله المستعان .. هذي درجة أول ميجر .. وكان هذا الشي درس لي ..
الميجر الثاني غيرت طريقة المذاكرة وشديت حيلي .. وكانت الدرجة أفضل بكثير من الأول ..


فكرة المذاكرة تتلخص في نقاط :
ـ ذاكر الأشياء اللي يعطيك إياها مدرسك واهتم فيها.. لكنها قد تساعدك على الفهم بدرجة 70% ليس أكثر .. ( على حسب مدرسك واجتهاده ) ..

- 30% المتبقية تأتي من مصادر أخرى .. يعني على سبيل المثال " الأولد اكزام " ابحث عنها غالباً ستجدها في المكتبات داخل الحرم الجامعي أو مع الطلاب الذين سبقوك بسنة .. هذه الأسئلة مهمة للغاية وتعطيك فكرة عن طريقة الإختبارات التي ستختبرها وستكون مصدر جيد للمذاكرة والمراجعة .. لأنهم لن يخترعوا في الغالب طرق أسئلة جديدة .. لذلك ستفيدك كثيرا ..

ـ استغل " الأوفيس أور " أو الساعات المكتبية للسؤال عن الأشياء إللي منت فاهمها .. كثير من المسائل في الرياضيات خصوصاً فهمتها بشرح بسيط من المدرس في الساعة المكتبية وربما لو أني سألت أحد الطلاب لما أعطاني إياها بهذه السهولة ..

ـ الواجبات .. فرصة للفهم والمذاكرة .. ونقلها لن يفيدك على المدى البعيد لا دنيا ولا آخرة ..
ـ للناس إللي ساكنة برة الجامعة .. يمروا على الطلاب إللي ساكنين في سكن الجامعة لأن جوهم حلو في المذاكرة .. وغالباً تحصل عندهم الملخصات والشروحات الحلوة ..

ـ أحيان تكون دافور في الماث لكنك جايب العيد في الإنجلش .. وتحصل واحد معك في الكلاس أو جارك في العمارة عكسك تماماً .. جايب العيد في الماث .. ومختم الإنجليزي من الدفرة !
طيب ممكن تسون حاجة حلوة .. كل واحد يشرح للثاني .. طبعاً حنا ما تعودنا إننا نشرح لبعض لأننا كنا دوافير أيام الثانوي .. بس تراها مرة جيدة للي ما جرب .. انت تفيد وتستفيد .. وتطلع أفكار جديدة تستفيد منها .. أهم شي لا ينقلب وقت المذاكرة سوالف !




>> المذكرة القادمة بإذن الله " عندما فكرت أسحب من الجامعة " !

 

حيا الله أخوي ..

ايه أكيد فكرت .. وراح أفصل في الموضوع في المذكرة القادمة ان شاء الله ..
وأظن إن الكثيرين من طلاب الأوريا يفكرون في نفس الشي .. وسيزيد العدد بعد الميجر الأول
.............
الإنقلش كنت في اقل مستوى a
لكني تخرجت بقريد مرة حلو نهاية السميستر .. ولله الحمد ..